1.1. Ангил Баро Дэвэл кэрдя болыбэн тэ пхув.
1.2. Э пхув сыс нанги тэ нанэ дыкхны, о калыпэ сыс прэ саро со явэла тэнчи, и паны сыс тэлэ, и Дэвлэскро Духо урнялас упрал.
1.3. О Дэвэл пхэндя: мэк явэла парныпэ. И парныпэ явья.
1.4. О Дэвэл дыкхья со парныпэ сы лачё, и розлыджия парныпэ и калыпэ.
1.5. О Дэвэл кхардя о парныпэ "дывэс", а калыпэ "рат". И рат явья, и рат прогыя: перво дывэс.
1.6. О Дэвэл пхэндя: мэк явэла учипэ машкир о паны, тэ пашакирэл ёв о паны панестыр.
1.7. О Дэвэл кэрдя учипэ, и пашакирдя о паны тэл о учипэ панестыр упрал. Дя и кэрдяпэ.
1.8. О Дэвэл кхардя учипэ сыр болыбэ. И рат явья, и рат прогыя: дуйто дывэс.
1.9. О Дэвэл пхэндя: мэк паны со тэл о болыбэ скэдэлапэ кхэтанэ, тэ явэл о шукипэ. Дя и кэрдяпэ.
1.10. О Дэвэл кхардя о шукипэ сыр пхув и кхардя о паны со скэдыяпэ "мори". О Дэвэл дыкхья со ада мишто.
1.11. О Дэвэл пхэндя: мэк э пхув барьякирэла чярья, тэ кашта, тэ дрэвы, сарэ семенэнца. Дя и кэрдяпэ.
1.12. Э пхув барьякирдя чярья, тэ кашта, тэ дрэвы, сарэ семенэнца. О Дэвэл дыкхья со ада мишто.
1.13. И рат явья, и рат прогыя: трито дывэс.
1.14. О Дэвэл пхэндя: мэк про болыбэн свэтинэла со чеби тэ пашакирэл о дывэс ратятыр, тэ сыкавэл дывэса и бэрша и времё и тэ пхэнэл со явэла;
1.15. Мэк ёнэ свэтинэна болыбнастыр прэ пхув. Дя и кэрдяпэ.
1.16. О Дэвэл кэрдя дова, со свэтинэл, кай барэдыр ваш о дывэса, кай тыкнэдыр ваш о ратя, и кэрдя чергэня.
1.17. О Дэвэл чюдя лэн дро учипэ тэ свэтинэн прэ пхув,
1.18. тэ явэн хуланца ваш о дывэса и ратя, тэ розлыджян парныпэ и калыпэ. О Дэвэл дыкхья со ада мишто.
1.19. И рат явья, и рат прогыя: штарто дывэс.
1.20. О Дэвэл пхэндя: мэк о паны биянэла бут со джидо, и мэк о чириклэ урняна упрал, кай болыбэ.
1.21. О Дэвэл кэрдя барэ мачен и сарэн кон дживэл дро паны и сарэ чириклэн. О Дэвэл дыкхья со ада мишто.
1.22. О Дэвэл дыя лэнгэ лачё лав и пхэндя: дэ о джиипэ чяворэнгэ, тэ явэл тумэн бутыр и тэ явэл паны пхэрдо, маче дро паны и чириклэ прэ пхув.
1.23. И рат явья, и рат прогыя: панджьто дывэс.
1.24. О Дэвэл пхэндя: мэк э пхув биянэла бут со джидо, сарэн кон дживэл. Дя и кэрдяпэ.
1.25. О Дэвэл кэрдя сарэ зверен и сарэ сапэн, сарэн кон псирэл пир э пхув. О Дэвэл дыкхья со ада мишто.
1.26. О Дэвэл пхэндя: мэк мэ кэрава манушэс, со поджял прэ Мандэ, тэ явэл ёв хуласа ваш э маченгэ, тэ ваш э чириклэнгэ, тэ ваш э зверенгэ и ваш э сапэнгэ, тэ ваш сари пхув.
1.27. О Дэвэл кэрдя манушэн со поджян прэ Лэстэ, муршэс кэрдя тэ джювля.
1.28. О Дэвэл дыя лэнгэ лачё лав и пхэндя: дэ о джиипэ чяворэнгэ, тэ явэл тумэн бутыр и тэ явэл э пхув пхэрды, и явэн хуланца ваш э маченгэ, тэ ваш э чириклэнгэ, тэ ваш э зверенгэ и сапэнгэ, сарэнгэ со сы прэ пхув.
1.29. О Дэвэл пхэндя: эна, Мэ дыём тумэнгэ сарэ чярья, кашта тэ дрэвы семенэнца савэ сы прэ пхув - тэ хан и тэ чялён.
1.30. Тэ сарэнгэ кон джидо, сарэ чириклэнгэ, сапэнгэ, зверенгэ Мэ дыём чярья тэ кашта тэ хан и тэ чялён. Дя и кэрдяпэ.
1.31. О Дэвэл дыкхья саро со Ёв кэрдя, и саро сыс дриван мишто. И рат явья, и рат прогыя: шовто дывэс.
2.1. Кадякэ сыс кэрдэ и пхув, и болыбэ, и сарэ кон дживэл одой.
2.2. О Дэвэл кэрдя сари Пэскири буты кэ дывэс эфтато, и дро дывэс эфтато Ёв откхинёлас.
2.3. О Дэвэл дыя лачё лав ко дывэс эфтато, и кэрдя лэс свэнто дывэс, сыр Ёв откхинёлас дрэ адава дывэс коли кэрдя сари Пэскири буты.
2.4. Эна сыр саро сыс кэрдо Дэвлэса. И коли о Дэвэл кэрдя э пхув и о болыбэ,
2.5. прэ пхув на сыс ни кашта барьитка, ни чярья фэлдытка, одолэстыр со Дэвэл на бичядя брышынд прэ пхув и на сыс манушэс тэ кэрэл буты прэ пхув,
2.6. екх о паро джялас упрэ пхувьятыр и рисёлас прэ пхув.
2.7. О Дэвэл лыя прахо пхувитко, и кэрдя манушэс, и запхурдыя о джиипэ лэскэ дро накх, и мануш ячья джидэ йилэса.
(перевод Л. Мазикина, редакция В.Солдатенко)