Ньурба оройуонугар култуура тэриллибитэ 100 сыла.
“Баяным алыптаах дорҕооно”
Ыам ыйын 20 күнүгэр Чаппанда нэһилиэгэр “Дьоҕур” норуот айымньытын дьиэтигэр
Ньурба оройуонугар култуура тэриллибитэ 100 сылынан, култуура эйгэтигэр өр кэмҥэ үлэлээн ааспыт дьоннорбутун, үтүө ааттарын үйэтитэн Саха Өрөспүүбүлүкэтин култууратын туйгуна, Ньурба оройуонун култууратын уонна норуот айымньытын сайдыытыгар кылаатын иһин бэлиэ хаһаайына , баянист Дмитрий Никитич Гуляев аатын үйэтитэн, киниэхэ анаммыт улуустааҕы баянистар күрэхтэрэ бэрт сэргэхтик, үрдүк тэрээһиннээхтик буолан ааста. Барыта биэс кыттааччы кэлэннэр, бэйэлэрин билиһиннэрииттэн саҕалаан, баян кэрэ матыыптарын тыаһатан, дьоннору ыллатан, дьону үҥкүүлэтэн бэрт интэриэһинэйдик ааста. Баянист барыта биир тэҥник оонньуур буолбатах. Бары даҕаны тус-туспа суоллаах-иистээх баянистар кэлэн кытыннылар. Ханнык баҕарар инструмены баһылааһын ураты уустук. Элбэх үлэттэн, биир да күнү көтүппэккэ, илиини араарбакка эрчийииттэн, бириэмэни харыстаабакка дьарыктан турар. Сүрэх уонна баҕа наада. Күрэххэ Акана нэһилиэгиттэн Люция Иванова, Нюрбачаан нэһилиэгиттэн Людмила Сергина, Ньурбаттан Ньургустаана Константинова, Ньургуйаана Семенова, Тимофей Шестаков кытыннылар.
Күрэх дьүүллүүр сүбэтигэр үлэлээтилэр опыттаах култуура үлэһиттэрэ, ДК “Кыталык” кииниттэн Петрова Зинаида Тарасовна, Светлана Герасимовна уонна Дмитрий Никитич аймахтарын ааттарыттан, Мэҥэ Хаҥалас Табаҕа сириттэн сыдьааннаах, күтүөт Юрий Антонов . Туох барыта түмүктэнэр, ким эрэ кыайыылаах буолар, дьүүллүүр сүбэ быһаарыытынан маннык анал ааттар иҥэрилиннилэр:”Иэйиилээх дорҕоон” анал аат Люция Иванова (Акана), “Дьоҕур” анал бирииһин, “Кэскиллээх баянист” Ньургустаана Константинова, 3000 суумалаах “Самсонг” маҕаһыынтан ыларыгар Администрация сертификата, “Тохтор дорҕоон” Тимофей Шестаков, “Дьоҕур” анал бирииһэ, “Тэтимнээх дорҕоон” Ньургуйаана Семенова уонна “Алыптаах дорҕоон” 10.000 суумалаах ДК “Кыталык” Сертификатын тутта, “Кылаан кыайыылааҕа” үрдүк ааты ылла, Ньурбачаан нэһилиэгиттэн кыттыбыт баянист Людмила Сергина уонна аймахтарын ааттарыттан 30.000 тыһыынчаны харчынан уонна 30.000 тыһыынчаны харчынан Ньурбачаан “Уйгулаана” ансамбль анал бирииһин тутта. Бары күрэх кыттыылаахтара Добун суруктарынан уонна аймахтара оҥотторбут өйдүөбүнньук статуяткаларынан наҕараадаланнылар. Дьүүллүүр сүбэҕэ Махтал суруктар туттарылыннылар, Бары күрэх кыттыылаахтарыгар анал статуяткалар туттарылыннылар.Күрэҕи бэйэлэрин ырыаларынан киэргэтэн, силигин ситэрэн биэрбит ырыаһыттарбытыгар: “Алгыма”, “Эйээрэ” ансамбылларга, ырыаһыт, мелодист Гавриил Монастыревка , кырачаан ырыаһыт Диана Антоноваҕа, сыана бэтэрээнэ Тамара Семеноваҕа, саксофонист Евгений Оготоевка, “Уйгулаана” дьахталлар ансамбылларыгар, Сүлэ , Акана нэһилиэктэриттэн кыттыбыт ырыаһыттарга, Алена Иудиноваҕа.. уонна да атыттарга улахан махталбытын тиэрдэбит. Күрэҕи иилээн-саҕалаан, салайан ыытта уус-уран салайааччы Саргылана Семенова. Баян алыптаах тыаһыттан кэлбит ыалдьыттар дууһалыын сынньайан, баянынан ылламмыт ырыаны истэн дуоһуйан, баян тыаһыгар үҥкүүлээн, вальстаан астынан тарҕастылар. Бу киэһэ кэлбит ыалдьыттар Дмитрий Никитич туһунан истиҥ тылларынан, элбэхтик ахтан-санаан аастылар. Бары күрэх кыттыылаахтарыгар, Дмитрий Гуляев аймахтарыгар, Маргарита Никитичнаҕа, чугас дьонноругар, ырыаһыттарга олохтоох администрация, “Дьоҕур” норуот айымньытын үлэһиттэрин аатыттан улахан махталбытын тиэрдэбит. Баҕарабыт чэгиэн доруобуйаны, ситиһиилэри, уһун дьоллоох олоҕу. Өссө да маннык тэрээһиннэр кэмиттэн кэмигэр ыытыллан иһиэхтэрэ.
Елена Тимофеева, Чаппанда нэһилиэгэ