Научникы из высшоіучилища Іоханесбурга су проводили химичны анализ метеорита, ктор быше наидан в египетскоі пустыніе в 1996 году. Он быше назван Гипатіеі за почесті Гипатіи Александриіскоі (първа жена-научница в повѣсти человѣкства).
Метеорит іе одличен структуроі си, од ктороі приіѧше назву "наі-страннаго камена на планете". Изисканіе-то подтвърдише го посебності, бо в составу быху наидани слѣды выбуха суперновы, пише Icarus.
Изисканіе 2015 года показаше, же Гипатіа не сѧ односи до ни іеднаго извѣданаго типа метеоритов и комет. Она има в составу фосфид никіеліа, ктор не іествуіе в Слонечноі составе.
Творцы новаго научнаго труда анализоваху метеорит с помочіу протоннаго микрозонда. Метод уможнише достати безпрецедентну точності. Научникы су идентифицирали 15 различных елементов в Гипатіи.
Изисканіе-то показаше, же образцы имут удивително низко содържаніе кремника - міенш 1 процента. При тому, содържаніе железа, сѣры, фосфора, мѣди и ванада іе аномално велікым.
Научникы приидаху до закліученіа, же химично Гипатіа іе много одличноі од обіектов Слонечноі составы, тому она муси быти сформирована внѣ тоі. Елементы наі‐добро соодношут с тыми, кторы сѧ поіавут при выбухе суперновы класа Ia.
Здроіами такых выбухов іествуіут звѣзды - бѣли карликы. То су невеліки, але неповѣрно гѫсти останкы міертвых свѣтидл. Правидлово, они не су активными.
Але иногда они достаіут звѣзд-"компаніонов". Бѣли карликы изношут твориво (субстанціу) из них и слѣд того сѧ становут толико горѧчими, же сѧ случа выбух.
Выбухы суперновых класа Ia сѧ личут наі-енергитичными сбытіами во Всіемиру. Они сѧ случут 1-2 раза през вѣк и творут наі‐велікы процент железа в космосу. Изисканіе показаше, же 8 од 15 елементов Гипатіи (кремник (Si), сѣра (S), вапник (Ca), титан (Ti), ванад (Va), хром (Cr), манган (Mn), железо (Fe) и никіелі (Ni)) соодношут с теоретичным описом послѣдствиі выбуха свърхновоі. Ини елементы (глиник (Al), фосфор (Ph), хлор (Cl), пепелник (поташик) (K), мѣді (Cu) и цинк (Zn)) Гипатіа можеше унаслѣдити од уміерѫчеі червеноі звѣзды.
