К святой великомученице Ирине обращаются с молитвенными просьбами об исцелении от недуга, о сохранении мира
Тропарь
А́гница Твоя́, Иису́се, Ири́на, / зове́т ве́лиим гла́сом: / Тебе́, Женише́ мой, люблю́, / и, Тебе́ и́щущи, страда́льчествую, / и сраспина́юся, и спогреба́юся Креще́нию Твоему́, / и стражду́ Тебе́ ра́ди, / я́ко да ца́рствую в Тебе́, и умира́ю за Тя, / да и живу́ с Тобо́ю, / но я́ко же́ртву непоро́чную, приими́ мя, с любо́вию поже́ршуюся Тебе́. / Тоя́ моли́твами, // я́ко Ми́лостив, спаси́ ду́ши на́ша
Кондак
Де́вства добро́тами преиспещре́нна, де́во, / страда́льчеством была́ еси́ красне́йшая, Ири́но, / кровьми́ твои́ми исте́кшими обагре́на, / пре́лесть же низложи́вшая безбо́жия. // Сего́ ра́ди и прия́ла еси́ по́чести побе́ды руко́ю Созда́теля твоего́.
Молитва
О многострадальная и преславная Ирино, невесто Христова всехвальная, угоднице Божия! Ты предстоиши у Престола Пресвятыя Троицы и наслаждаешися неизреченнаго блаженства.Призри убо милостивно на нас, приносящих ти хвалебное пение сие, испроси нам милость, отпущение грехов у Преблагаго Господа,вемы бо, воистинну вемы, яко вся, елико восхощеши, испросити у Него можеши.Темже убо смиренно припадаем к тебе и просим: умилостиви Владыку неба и земли, да подаст нам дух твоея ревности ко хранению святых Его заповедей,яко да возможем земное поприще в добродетельном житии проводити, райских селений унаследовати и тамо с тобою и всеми святыми прославляти Отца и Сына и Святаго Духа во веки веков. Аминь.