Мая Державиналэн серемес веросэз
Пичи, восьтэт мугоро Петыр кыкетӥ классэ ветлэ, портфелез аслэсьтыз бадӟымгес адӟиське, ява. Музъем гогы но музъем гогы! Пичизэ шӧдыса сямен, бускельёссылэн кечтаказы но сое весь лекалля. Кечтака ӝужыт, сьӧд, лусьтро, бадӟым сюръёсыз позыръяськемын. Котькуд ӵукна, Петырез возьмаса сямен, капка азязы сюрыныз йырзэ позыръяса сылэ. Пияш капкатӥз потэ гинэ но, кечтака дораз соку ик бызьыса лыктэ, собере сое ташак! лексьыса бекмыльтэ. Ма, со пичи муртэ сумкаез берлань кыске бере, Петыр гаӵак! усе. Пияшлэсь султыны турттэмзэ кечтака быльккес, бирды кадь курень синъёсыныз учкыса сылэ. Ас понназ серекъяса малпа кадь: «Султы, султы, Петыре, собере нош бекмыльто!»
Со кечтака воксё чёртлы укша ук! Валамон ини, лексьыны шедьтэмез бере Петыр зар! бӧрдыны кутске. Ма, кызьы уд бӧрды? Пичи пияш султэ но бызьыса берен дораз кошке. Уг ке вуы, кечтака выльысь берласянь донгыса лэзе, соку куанер нош азьлань чукмыса кошке. Кечтакалэн олокӧня пол лекамез бере песятаез нунокезлы ма карыны валэктэм: «Тон, пие, кечтакалэн сюръёсыз борды кырмиськы но, синмаз учкыса, ымныраз сяла!»
Мукет нуналэ «чёрт» нош ик сыскиськыса, бадӟым тушсэ сэзъяса сылэ. Петыр кышкамзэ ӧз возьматы ни, дораз мыныса, сюр бордаз кырмиськиз но, ымаз дыльдызэ люкаса, кечтакалэн ымныраз сялӟиз. Соиз паймыса дол! сылэ, интыысьтыз уг но вырӟы.
Петыр сюр бордысьтыз киоссэ каллен гинэ басьтӥз, бызьыса дораз бертыны дась вал ни но, ассэ кияз кутӥз. Кӧня ке ваче син учкыса сылӥзы. Кечтака ӧз но вырӟы, кызьы сылӥз, озьы ик кылиз, сыскиськемысь гинэ дугдӥз. Петыр, мышсэ учкылыса, школа пала дыртытэк гинэ вамышъяз.
Тӥни озьы пичи маке бадӟым кечтакаез вормиз. Мукет дыръя сюро йыр Петыр шоры ӧз но учкылы ни, пияш вӧзтӥз кошкыкуз, сыскиськыса кыльылӥз. Соку Петыр песятаезлэсь паймыса юаз, малы кечтака сое уг иса ни шуыса. Песятаез валэктӥз: «Кеч — туж юрдӥсь пудо, соин ик, пие, со тонэ уг иса ни, табере со тынэсьтыд юрдэ». Ачиз гор-гор серекъяны кутскиз, Петырлэн кышканэз быриз угось.
Табере пияшез айы ӟазег гинэ уйылэ на. Сое кызьы вормыны песятаез ӧз дышеты на.