Шьалодиа Аџьынџьал дышәҟәыҩҩдуун, ибызшәа цқьан, ихшыҩрҵаган, Аҧсни аҧсуа жәлари рзыҳәан иааҧсара рацәан. «Афоризмқәа» ҳәа Аҟәа 2006 ш. азы иҭыҵыз ашәҟәы Аҧснытекантә иҭызгеижьҭеи крааҵуеит. Уи иалоу аҳәоуқәа хкьыҧхьлааны аинтернет ианҭоугало анбанқәа ыӡуеит, узамыҧхьо иҟалоит. Абри аҭагылазаашьа зыӡбак аҭаны ашәҟәы ахәҭак иахьа сдаҟьаҿ ишәзанысҵоит. Иацу, хымҧада, дук хара имгакәа иҟалоит.
• Дгьыли жәҩани еиниҟьарашәа ирдыдуа ирмацәысуа даацәырҵын «дыхьӡырҳәагаха, ихи ишьапи еинҟьо дцеит дӡагә-ӡагәуа дцеит дыхьӡыда-ҧшадаха.
• Аҩысҭаацәа иқәтәан, абгахәыҷы аҧа ацәиӡон, ажьа ыҩны ишцоз дахьӡаны исон!..
• Мҳаҵәк азна ахшыҩ изҭамызт, ауаа ахшыҩ дсырҵоит ҳәа даҿын!
• Уажәымҭа зырӷәӷәо уанҿаз ишьҭоуҵаз ауасхыр ауп.
• Ихылҧа аҵкыс ихы ласын, ҧшак асцыҧхьаӡа ихҧааны иагон.
• Шьакаҭәарада аиааира, хәамаӡам.
• Агәеилашәара шимаз еиҧш, агәхьаҧссарагьы иман.
• Анцәа изқәикыз ауаҩы изахырҧом.
• Абаҩхатәра ауаҩы игәаҿы ишәыроуп, ашәыр аҵла ишҿоу ишәышәуа еиҧш.
• Згәы каҳаз, аҩаршьҭраҵәҟьагьы иҽеиҭар дагоит.
• Аҵәца ҟьашь аӡыхь иҭыршьыр, аӡы зегьы аҟьашьуеит.
• Аӡиас амҩа укыр, аҽа мҩак аҧшаауеит.
• Агәабзиара зыҧсоу уздырӡом иуцәыӡуа уалагаанӡа.
• Ашәҭ лқьышә ианықәу, ашҳам лыбз иаҵоуп.
• Иҳаздыруам акәымзар, шанашәа ҳшоуп, ҳаниз амш инаркны ҳазегь ҳаҿхәара ҧҵәоуп.
• Агаӡа есқьынагьы аҧхьагылара дашьҭоуп ишьҭахь игылоу ихы дирбаларц. Аҟәыш иҽааникылоит иаҧхьа инеиуа ахьцо ибаларц азы.
• Ала акәац аагара иуздәықәҵараҳа, иаргьы акы сзаага ҳәа игәра ганы ашә аҟынӡа дузынашьҭуамызт.
• Амаамынқәа ҳашрыхәаҧшуа аиҧш акәзар ҳаргьы џьоук хыхьынтәи ишҳахәаҧшуа.
• Дӷьаз-ӷьазуа иҧшра исахьа уахьихәаҧшуаз акы игуп узҳәомызт, аха анцәа данишоз ахшыҩ иҭара ихашҭызшәа ихы ҭацәын.
• Убасҟак иӷәӷәан иажәа, ақәаб азна аӡы мцада иаршуан, илымҳагьы убасҟак иҵарын, ҵыси-ҳәыҳәи еибырҳәоз иаҳауан.
• Иҧынҵа аҧссашьа иҵаанӡа, ахарҵҵалара далагеит.
• Џьоукы-џьоукы зымҩа игыланы рхы рбозҭгьы, ауаа рахь ацәырҵра иаҟәыҵуан.
• Абга шыбгоу ахашҭуан, алажәқәа ацрашуа иашьҭамлозҭгьы.
• Ахьча бзиа иуасақәа ирҟәыдуеит, исаӡом.
• Уи ихшыҩ убасҟак иҵарын, аӡиас хшыҩҵакык хыршәланы ишаго ибаргьы дахьӡаны иамихуан.
• Зышәқәа маатуа аҩны мра ҩнаҧхом.
• Ауаҩы, аҵла иҿало ашәыр деиҧшуп, дииуеит, дҟалоит, диасуеит.
• Џьаҳаными џьанаҭи рцаҧха иара идыркызшәа ихы ибон.
• Аиаша уавызго амҩақәа рацәоуп, ашҟа узго акызаҵәык ауп.
• Аҳәынҭқарцәа амчра ирымоу иацназго ахшыҩ рымазҭгьы, еибашьра ҟалаӡомызт.
• Есымша аха змам ахаангьы ҟаҵа имаӡам.
• Зхы уазырхәарц иушьҭоу ушәшьыра дыҵагылоуп амра ахьынӡауқәҧхо, уқәҧхара ианаҟәыҵ нахыс, угага убараҳа дубаӡом.
• Агәы ахәра заҟа имариоу аҟара арӷьара мариазҭгьы гәыхь ҟалаӡомызт.
• Ухазы анасыҧ анучаҧо, уҩыза игәы аҵәымӷ алоумҵан.
• Аласра ахшыҩ ианаҧысуа ауаҩы дҭанархоит.
• Сыгәра зымго сиқәшаҳаҭхаргьы, зегь рыгәра зго сызиқәшаҳаҭхом.
• Ашәаргәында лассы-лассы игәы дҭасуеит сфырхаҵаны сзымизеи ҳәа.
• Амца зыцрамсыц абылра хьаа закәу издырӡом.
• Арашь иақәтәоугьы ҧинак ицҳахьеит.
• Мал умаӡамкәа аӷәыцәҳәы уқәтәазар еиӷьуп, ламыс умаӡамкәа амал уалатәазар аасҭа.
• Адгьыл гароуп, ауаа зегьы уи игароуп, Иисус заҵәык иоуп игарҵхьоу.
• Даҩысҭаауп, дгызмалуп, ашьацҳәа иакны иацәцахьоу абгахәыҷы деиҧшуп.
• Аҧсҭазаара зынӡа иуцәыӡыр аасҭа, иқәыршә-ҵаршәны акәзаргьы иумазар еиӷьуп.
• Ала зырӷыӷуа, ишицҳауагьы идыруазар ауп.
• Санқәыҧшыз аҧсра сышьҭан сазыҧшаауамызт, санажә сара сашьҭоуп исзыҧшаауам.
• Ашәирақәа зегьы иреицәоуп «жәлар рылахь уоуааит». Аныҳәарақәа зегьы иреиҳауп «жәлар рылҧха уоуааит».
• Иабалак умҳәалан уҿы аартны улақәа хҩаны.
• Абнахьынтәи знапқәа ҭацәны зыҩныҟа ихынҳәуа дынхаҩӡам.
• Амца урцых-цыхцыҧхьаӡа аҽараапкуеит.
• Ауаа еибамжьозҭгьы изеицынхомызт.
• Амал ацәеижьы арҧхоит, аламыс агәы.
• Аҧсра мыжда ажәра аҿара еилнахӡом, аха ацәгьеи абзиеи еилнахуеит, изышьҭоу абзиақәа роуп.
• Ақьаад цқьеиҧш, ирласны анапы зҟьашьуа аҽакы ыҟаӡам.
• Аиҳабы-аиҵбы аныҟамла, ауаа еиҟарахоит.
• Аџьмагыды атәыҩа иашьҭалаз лымҳада иаанхеит.
• Агаӡақәа реиҧш ирласны еилибакаауа аҽа џьоук ҟалаӡом.
• Аҧсра аҵкыс ахьымӡӷ дацәшәон, убасҟак дахӡыӡаауан иламыс.
• Иуцыччо духашҭуеит, иуцҵәыуо духашҭӡом.
• Ууаҩыбжара уанахыслак нахыс, уаныҷкәыназ абзиара ззуухьаз урыцәшәала.
• Абга акәацфара иаҟәыҵыр ахаҧыцқәа каҧсоит.
• Аҧша иҿнаршәаз абӷьыц иара ахьцо иагоит.
• Амал зцәыӡыз акгьы ицәымӡит, аҩыза дызцәыӡыз ибжа ицәыӡит, заҧсуара зцәыӡыз зегьы ицәыӡит.
• Аӡышра уакӡаанӡа аҵеџь ажра уаламгар, аӡы аҟны унаӡаанӡа уҿажәкны уҧсуеит.
• Абзиагьы ззымдыруа, ацәгьагьы ззымдыруа, зегьы идыруашәа игәы иабоит.
• Агаӡақәа ҳҟәышхеит ҳәа рҳәо ианалага, аамҭа цәгьахоит.
• Ахьыӡ адәныҟатәи ҽырбагоуп, аламыс – ҩныҵҟатәи рҧшӡагоуп.
• Ҳашҧаҟоу уҳәарауазеи, Анцәа ҳиҳәоит уҳацхраа ҳәа, аҳәынҭқар ҳиҳәоит ҳаумшьын ҳәа...
• Ахшыҩ аҟәышрахь ушаго еиҧш, агаӡарахьгьы уагоит.
• Зхацәа рыцәгьа еибызҳәо аҳәсақәа реиҧш ирласны еизааигәахо ҟалаӡом.
• Кәицк алшәан скылнаблааит ҳәа амца уацәгәааны ухәшҭаара умырцәан, зынгьы ушарҧхахьаз ухоумыршҭын.
• Имажәуа ҳәа иҟоузеи? Агәырҩаҵәҟьагьы ажәуеит.
• Аҧсҭазаараҿы аҧсра аҵкыс еицәоу арыцҳарақәа ҟалалоит.
• Ауаҩы игәы ишаанаго еиҧш зынӡа днасыҧдаҵәҟьангьы дҟамлаӡац, игәы ишаҭахыу еиҧш насыҧ дуӡӡак, имангьы дҟамлаӡац.
• Иааҟәымҵӡакәа иҳаҩсхьоу аамҭа иалацәажәо, зҧынҵа иахыҳәҳәаны заҧхьаҟа акгьы зымбо иоуп.
• Аҵааршә иалагылоу ашәҭыҵла, узымышәҭуазеи ҳәа уазгәаан ихумҵәан.
• Хык бзиоуп, аха хшыҩла ианҭәу иаҳагьы еиӷьуп.
• Ахы бзиан аус анауа, агәы аҧсашьоит.
• Ҩныҵҟала иҟьашьу иаҟара адәахьала аҽырҧшӡара иашьҭоу дҟалаӡом.
• Ажәра аӡәгьы иҭахӡам, аха ақәра ду зегьы ирҭахуп.
• Зышьҭахь хызтыз аиқәа зиҭахузеи.
• Заа дшәымҵәыуан, зны дымҧсыр аушам, усҟан азы иқәшәыҧсаша лаӷырӡқәак аанышәкыл.
• Ауаҩы адунеи данықәлоз дҟьантазӡа дшааз еиҧш даналҵуагьы дҟьантазӡа дцоит.
• Зҿаҵа зырдууа иҧсҭазаара иркьаҿуеит.
• Ухы-уҧсы иагужьыз уҧсҭазаара иацнаҵоит.
• Ауаҩы цәгьа, абзиагьы ацәгьа алихуеит.
• Аӡы анхыҵуа ахаҳәссақәа роуп иаго, адуқәа аанхоит.
• Ухаҧыцқәа ыҵырхаанӡа убз аҭра иҭоумкыр, излаанукыло узнымхар алшоит.
• Адәныҟатәи ахәра аҩныҵҟатәи амчра иарӷьароуп.
• Адәахьала анцәа дитәушәа ихы уирбон, аха ҩнуҵҟала аџьныш дитәитәхьан.
• Изакәытә насыҧузеи ауаҩы имоу, иибои, иаҳауеи иашоу ахьынӡаџьишьо.
• Аҟьаҟьараҿгьы ушьапы уаҧшны иумыргылар укаҳауеит.
• Уи аума далашан, ала аҵыхәа акьаҧа адҳәаланы уасоуп ҳәа иҭиуан!
• Заҟа ҳамдырқәозеи ҳарҭ ахәашақәа, «Адгьыл уара иутәым», «Сара истәуп» ҳәа ҳаҧсы ахьынӡаҭоу ҳаиҿагыланы ҳаибашьуеит. Иара ҿымҭӡакәа ҳаманы ишцо аабаӡом.
• Акәыбрыҵәҟьагьы ҧшак аҵасны ашьхарахь ианҩанагалак, шьауардынушәа ахы або иалагоит.
• Уахгьы-ҽынгьы акрыфарада хьаа змам, ихаҧыцқәа рыла инышәынҭра ажра даҿуп.
• Ауаҩы лаҟә есқьынгьы ауаҩ ҳаракы дицәымӷуп, сара саҵкыс иара дзеиҳаузеи ҳәа.
• Утәы-стәы ыҟамызҭгьы, изакәытә насыҧыз ажәлар ироураны иҟаз.
• Акгьы ззымдыруа, зегьы рыгәра игалароуп.
• Ауаҩы лаҟә ашьха дхаугалеит ҳәа дузеиҳаракуам, аҳарак ҵаҟа дылбааугеит ҳәа дузыларҟәуам.
• Ааҵәа иҭоу ахы ҿазҳәо итәуп.
• Азакәан ауаа еилнахуа иалагар, аҳәынҭқарра ҟьантазӡа еилнахуеит.
• Ахьӡ бзиа арҳара акыр аҭахуп, арӡра акгьы аҭахӡам.
• Шәҩык аӷацәа умазар ишәарҭам, ухы уаӷахар аасҭа.
• Аҩы зҭаны игылоу ауалыр уахагылацәар, уаванариоит.
• Ҵәык азна акәац аӡразы иҩны рбганы амца еиқәиҵеит.
• Уҽаанкыл! Уара ҩнапык умазар, саргьы снапызаҵәны сшымиз удыруаз!
• Узҭахым шәҩык умазар еиӷьуп, узҭаху аӡәгьы думамзар аасҭа.
• Ҳаӷоу иҭаацәа рыҩныҵҟа дмыцхәхааит.
• Аиҩызцәа хьшәашәара хәыҷык зыбжьалаз, иаразнак ианрызмырҟәанда, ирыбжьаҵаауеит.
• Ашәыр хәаҧса ахалагьы иҿшәоит, зҿыхра мариам абзиа ауп.
• Аҩын ду гылоуп ҳәа акәӡам ауаа зымҩахыҵуаз, ауаҩ ду дынхоит ҳәа ауп.
• Улацәа аныхтуа инаркны ауаҩра уашьҭамлар, ихуҩаанӡа иузыҧшаауам.
• Ибз ҟьаҟьаӡа иҟан, аха ицагәын.
• Аҧсыӡ аҵыхәа есқьаангьы иазгәааны иҟоуп, уара усхагыламызгьы сара аӡәгьы сизкуамызт, симпыҵҵәраауан ҳәа.
• Аҧсра мацара азхом уанахырго рнапы уқәыргыланы унаскьагаразы.
• Абааш адәахьала егьа аахаргьы иачҳауеит ҩныҵҟала аҷҷара иалагаанӡа.
• Иҧсадгьыл аныбылуаз иацраз амца дыҽҳәатәаны иҽирҧхон.
• Аҧсра уацәшәаны ацә атәыҩа уҭаларгьы уаҧшаауеит.
• Ажәа ҟәанда аҵааршә арӡыҭуеит.
• Аҧсра уацәшәо уалагар, иҩны иушьҭалоит.
• Унапы мырбааӡакәа иузыӡәӡәом.
• Аччара иаҟәыҵыз иҿы еималоит.
• Ашәахсҭа зну, ахәра закәу ихашҭӡом.
• Ауаҩы ихы данаӷахалак, ихшыҩ шәаны аҽаҵәахуеит.
• Агәы мыжда иалаӡозеи, ишуеит, ихьшәашәоит, иҵаауеит, ихаҳәхоит.
• Адунеи хкаам еиужьроуп зҳәада... адунеи хкаауп бахҭоуп, ахаан аӡәы иҧсы ҭаны дызҭымҵыц.
• Ушыбзоу уҧсны адгьыл уқәзар аасҭа, уҧсы шҭоу иара уқәзар еиӷьуп.
• Иаалырҟьаны иузцәырҵыз абзиабара уҽаумырблын, уи афархьмца еиҧш ирласны иҿыцәаауеит.
• Шьыбжьонынӡа дуцәнымхо укәа дҭалон, ашьыбжьышьҭахь дмаҭханы ухәда дакәшон.
• Уҧарц азы, аҧхьа ашьапы еихгашьа уҵароуп.
• Уҧрырц азы, аҧхьа амҵәыжәҩақәа ылугароуп.
• Уаӷа иҧшааразы хара умцан, укәшамыкәша унаҧшы-ааҧшы.
• Аласреи аҷкәынреи еибарҧшӡоит, аха ишеицу ажәра иҭалар, ажә дарҧхашьоит.
• Аҩызцәа рацәаҩны измоу ҩыза гәакьа димаӡам.
• Аҳцәа чымазара зҭааз ихаҭа дамгаргьы иҧшӡара агоит.
• Иаакылҟьаны узго ачымазара аҵкыс еицәоуп уагьызымго, уагьаазымго ачымазара.
• Сгәырҩа схәаҽуеит ҳәа аҩы уӡаалар, ухаҭа уахәаҽуеит.
• Ачымазаҩ исыхәоит ҳәа агәра ганы аӡыҵәҟьа ижәыргьы ихәоит.
• Зыхшыҩ кьаҿу иҧсҭазаара аухоит.
• Аполитика ҩ-ҿык амоуп, ҩ-цәак ахоуп, ахшыҩ змоу амыч змам имҩа акуеит, ахшыҩ змам, аха амыч змоу имҩа аанартуеит.
• Акры муӡакәа итәаны крызфо, иифо дафоит.
• Абз ҟьашь иҿы аӡы ҭыршаны алаҵәҟьа ахы иақәиҭәаргьы хәыц ықәымиаауа ицәнарҳәуеит.
• Абзиабара мыжда акалашәа иҟоуп, амҵәыжәҩақәа уҭаны аҩада ушышьҭнахуа еиҧш, умҵәыжәҩақәа рҟәыдны аладагьы улбаанашьҭуеит.
• Уҩны амца акны ибылуеит ҳәа иарҳәаргьы иахьтәоу имгыло аашьаҩ, крыфароуп анырҳәалак, иаҧхьа аӡә дызгылом.
• Амра ажәҩан аҧҭақәа шахнацо еиҧш ауп аччарагьы ауаҩы амамиқәара шихнацо.
• Аамҭа ҳәазо иушьҭоушәа ахы унарбоит, аха уажьоит, иануаҩслак иҧыруеит хьӡашьа умаӡам.
• Ашықәсқәа унҵыра иацырҵоит, угәабзиара иагдырхоит.
• Зыҧсадгьыли зыжәлари зҭахыу иҧсҭазаара зегьы қәҧароуп.
• Анцәа иоуп издыруа адгьыл заҟа ӡы аржәтәу, амра заҟа ақәырҧхатәу, заҟаҩ ықәнырхатәу, заҟаҩ џьанаҭҟа ишьҭтәу, заҟаҩ џьаҳанымҟа идәықәҵатәу.
• Ацгәы еиҧш аҧсыӡ бзиа ибон, аха ашьапы рбааӡара иҭахымызт.
• Иҩуа ауаҩдура иашьҭоу дыҧсаанӡа дахьӡараны дыҟам.
• Аҧсуара акәымжәы шкәакәа еиҧшуп, аныҟәгара зегьы ирылшом.
• Ихы укыр иҵыхәа узкуамызт, унаҧшны уаахьаҧшаанӡа ажәҩан дналапҟа дцоу, анышә дныҵапҟа дцоу умбо, улаҧш дныҵаӡуан.
• Ҳзеилибакаауам акәымзар ҳазегьы ҳхы знаҳҟьо гәашьак ауп.
• Аҟәраанҵәҟьа ҧыруеит, ҳара аҧрышьа ҳзымҵацт... Издыруада уи ҳара ҳаҵкыс еиҳабызар?