Бүген Әгерҗегә Татарстан буенча көрәш федерациясенең башкарма директоры Марсель Таһиров килде.
Район башлыгы урынбасары Илфат Ямалиев, спорт бүлеге, спорт мәктәбе җитәкчеләре, район мәгариф идарәсе белгечләре белән узган киңәшмәдә Казан кунагы Әгерҗе районында көрәш буенча федерация төзү кирәклеге турындагы тәкъдимен җиткерде.
– Бу – көн үзәгендә торучы иң төп мәсьәләләрнең берсе, – диде ул. – Чөнки Әгерҗе районында көрәш “үлеп баручы“ спорт төре.
Чынлап та, районда спорт мәктәбендә генә көрәш секциясе эшләп килә. Анда да ике төркемдә нибары 36 яшүсмер шөгыльләнә.
– Иң төп проблема – тренер юклыгы. Бердәнбер тренер Рамил Шәрәфетдинов та төп эшеннән тыш кына шөгыльләнә. Аңа түләнә торган хезмәт хакы да ташка үлчим, – диде спорт мәктәбе директоры урынбасары Наталья Мөхәммәтҗанова.
– Икенче мәсьәлә – көрәшчеләргә шөгыльләнү өчен зал булмау. Янгын сүндерү частендагы хәзерге зал тиешле таләпләргә җавап бирми, – диде спорт мәктәбе директоры Илдус Чуков.
Марсель Таһиров федерация оештырылган очракта финанс яктан ярдәм итәчәкләрен, көрәш белән шөгыльләнү өчен келәмнәр, спорт костюмнары бирәчәкләрен дә әйтте.
– Республикада һәрдаим бәйгеләр уздырыла. Кызганыч, Әгерҗедән көрәшчеләр сирәк катнашалар. Ә районыгызда ярышлар бөтенләй оештырылмый, – диде ул.
Шуңа күрә авылларда да көрәшне яңарту мөһимлеген әйтте. Моның өчен районда берничә авылны үзәк итеп алып, якын-тирә авыллардан шунда яшүсмерләрне йөртүне оештыруны уйларга кирәк, диде.
Киңәшмәдә катнашучылар бу фикер белән килештеләр. Авылларда шөгыльләнү өчен зал да табылыр, транспорт мәсьәләсен дә хәл итәргә мөмкин. Районда федерация төзергә дә вәгъдә бирделәр. Әмма тренерлар булырмы...
