Ապրիլի 3-ին լրանում է Ռուսաստանի Դաշնության և Հայաստանի Հանրապետության միջև դիվանագիտական հարաբերությունների հաստատման 30-ամյակը, ինչի առթիվ ՌԴ ԱԳՆ հանդես է եկել հայտարարությամբ:
«Երեսնամյա վաղեմության իրադարձությունը սկիզբ դրեց #ռուս-հայկական համագործակցության զարգացման ժամանակակից փուլին։ Հիմք ընդունելով նաև բարեկամության ամուր ավանդույթները՝ Ռուսաստանն ու #Հայաստանը կառուցել են բազմակողմանի վստահելի դաշնակցային գործընկերություն: Անցած ժամանակահատվածում հաջողվել է ամենալայն ուղղություններով զգալիորեն առաջ մղել պաշտոնական Երևանի հետ գործնական փոխգործակցությունը: Ինտենսիվ քաղաքական երկխոսություն է ընթանում տարբեր մակարդակներում, ամրապնդվում են միջգերատեսչական շփումները, տարածաշրջանների միջև կապերը, երկու երկրների քաղաքացիների շփումները: Հոբելյանական տարվա ընթացքում նախատեսում ենք ծավալուն ծրագիր ինչպես քաղաքական, այնպես էլ մշակութային-հումանիտար ոլորտներում: Նախատեսվում է ՀՀ վարչապետ Նիկոլ Փաշինյանի պաշտոնական այցը #Ռուսաստան: Մինչ այդ՝ ապրիլի 8-ին աշխատանքային այցով Մոսկվա կժամանի Հայաստանի արտգործնախարար Արարատ Միրզոյանը»,-ասված է հայտարարության մեջ: Նշվում է, որ նախատեսում են ընդլայնել նաև իրավապայմանագրային բազան: «Աճում են առևտրատնտեսական ոլորտում ռուս-հայկական համագործակցության ծավալներն ու որակը։ Մեր երկրների միջեւ ապրանքաշրջանառությունը դուրս է բերվել կայուն աճի հետագիծ։ Խոշոր ծրագրեր են իրականացվում էներգետիկ, ատոմային, լեռնահանքային, տրանսպորտային-լոգիստիկ ոլորտներում: Զարգանում է նաև ռազմական եւ ռազմատեխնիկական փոխգործակցությունը ինչպես երկկողմ ձեւաչափով, այնպես էլ ՀԱՊԿ շրջանակներում: Հայաստանում տեղակայված ռուս զինծառայողներն ու սահմանապահներն համագործակցում են իրենց հայ գործընկերների հետ հանրապետության խաղաղ զարգացումն ու անվտանգ միջավայր ապահովելու համար: Ջանքեր ենք գործադրում տարածաշրջանային անվտանգության ամրապնդման ուղղությամբ։
Համոզված ենք, որ 2020 թ.նոյեմբերի 9-ի, 2021 թ. հունվարի 11-ի եւ նոյեմբերի 26-ի բարձր մակարդակով եռակողմ պայմանավորվածությունների անշեղ կատարումը թույլ կտա բարձրացնել վստահությունը Հարավային Կովկասում, կնպաստի տարածաշրջանը խաղաղության եւ կայունության գոտի դարձնելու»,-ասված է հայտարարարության մեջ: Նշվում է, որ Ռուսաստանում բարձր են գնահատում եղբայրական Հայաստանի հետ հարաբերությունները: «Այդ հարաբերությունները հաղթահարել են ժամանակի փորձությունները, ինչը թույլ է տալիս վստահորեն ծրագրեր կառուցել ապագայի համար։ Տրամադրված ենք ռուս-հայկական դաշնակցային հարաբերությունների հետագա ամրապնդմանը՝ հանուն մեր երկրների ու ժողովուրդների անվտանգության ու բարգավաճման ապահովման»,-նշել են ՌԴ ԱԳՆ-ում:
Լրացուցիչ տեղեկությունների համար այցելեք կայք