ԲԴԽ նախագահ Գագիկ Ջհանգիրյանը ԱԱԾ-ում հարցաքննության է հրավիրվել՝ 22 տարի առաջ սպանված զինծառայող Արման Հակոբյանի քրգործով։ Այս մասին Armenia Today-ին հայտնեց զինծառայող Հակոբյանի իրավահաջորդի ներկայացուցիչ Հայարփի Սարգսյանը։ «Սպանված զինվորի գործը 2001 թ.-ին ապօրինի կասեցվել է, իսկ այդ կասեցման մասին որոշման օրինականությանը հետևել է այդ ժամանակ ՀՀ զինդատախազ հանդիսացող Գագիկ Ջհանգիրյանը։ 2001-ին գործում առկա են եղել ապացույցներ, որոնցով կարող էին Հակոբյանին ծեծի ենթարկած զինծառայողներին կանչել քրեական պատասխանատվության, սակայն չեն արել և միայն 7 տարի անց՝ 2008 թ.-ին եղած նույն ապացույցներով մեղադրանքներ են առաջադրվել այդ անձանց, սակայն հետագայում վաղեմության ժամկետ է կիրառվել և նրանք չեն պատժվել»,-հայտնեց պաշտպանը։ Ըստ Սարգսյանի, ըստ էության, եթե 2001 թ.-ին Գագիկ Ջհանգիրյանը պատշաճ կարգով չի ստուգել այդ որոշման օրինականությունը, որով պետք է քրեական պատասխանատվության ենթարկվեին այդ անձինք և մեղադրանքներ ներկայացվեր նրանց։ «Հաղորդում էի ներակայացրել հանցագործության մասին, որպեսզի այդ գործով քննիչները և դատախազները կանչվեին հարցաքննության և պարզվեր, ի վերջո, 2001 թ.-ին այդ որոշման օրինականությունն ինչու պաշաճ կարգով չի ստուգվել։
Ի վերջո, ԱԱԾ-ն այդ գործով քննություն է իրականացրել, գործով վարույթն արդեն ավարտվել է, նյութերին ծանոթացանք և պարզվեց, որ Գագիկ Ջհանգիրյանն էլ պետք է հարցաքննվի»,- նշեց զինծառայող Հակոբյանի իրավահաջորդի ներկայացուցիչը՝ հավելելով, որ բողոք է ներկայացրել, որպեսզի Ջհանգիրյանը ևս հարցաքննվի, որը դատախազի կողմից բավարարվել է և մարտի 31-ին ԲԴԽ նախագահը կանչվել է հարցաքննության։ Նշենք, որ զինծառակող Արման Հակոբյանը մահացու հրազենային վիրավում է ստացել 2000 թվականի սեպտեմբերի 25-ին։ «Գործի նյութերով կան նաև տվյալներ, որ 2000 թ.-ի սեպտեմբերի 23-ին՝ առնվազն 3 զինծառայողի կողմից վերջինս ծեծի է ենթարկվել»,-հայտնեց Սարգսյանը։
Լրացուցիչ տեղեկությունների համար այցելեք կայք