Збызшәа зҭахым ажәлар жәларым. Урҭ рыҧсадгьылбзиабарагь ҧсажәоуп, иҧсыҽуп, уақәгәыӷуа иҟам. Ауаа ракәзаргь, урхыччаргьы, лажәхарҧа рзуургьы ҟалоит. Убри аҟынтә исҭахуп ҳхы ҳамҿаҟәарц, иҳамоу абызшәа ҳаҭыр ақәысҵарц.
Ажәак-ҩажәак рыла ишәасҳәоит гәҭакыс уажә исымоу. Ибзианы ижәдыруеит ҳара ҳтәылаҳра иамоу ахабарырҳарҭақәа зегьы аурыс цәа шрыҟәну, урысшәала аус шыруа. Ҳбызшәа акәзар, уи ҳтәалаҳраҿ амш шалагоу. Иалазгогьы ҳара. Абри агха ду ахарҭәаароуп, агәнаҳа алҵроуп изызку уажәтәи сҽышәара. Исҭахуп схатә хабарырҳарҭатә маҵзурак аҳасабла игәцароукша ажәабжьхырхарҭақәа ҭҵааны ишәыдызгалаларц. Сеилышәкаазар бзиоуп, сышәзеилымкаазар, аҵыхәтәантәи аҳәоу шәеиҭаҧхьа. Иааркьаҿӡаны иуҳәозар, хырхарҭала, лацәажәарҭала еиҟәшоу ажәабжьқәа рыҭҵаара мҩаҧыслоит уахыки-ҽнаки рыҩныҵҟа.
Адунеикаҭа (аинтернет) адаҟьақәа (асаитқәа) Аҧсны аӡбахәала еицҿакны излацәажәо акоуп: Аҧсны Урыстәыла ишаламло, аха Уаҧстәылаахыҵ ахада аиашьаратә тәылаҳра Урыстәыла иалалоит ҳәа ииҳәо ишадгыло.
Сара шәсазҵаауазар, Аҧсны ахадара ари азҵаара аҵыхәало иаҳәо гәыкала садгылоит. Аҧсны аӡәы ихьыҧшны, итәылаҳрамкәа (иҳәынҭқаррамкәа) ианыҟала ҧсроуп. Ҳара ианакәызаалак иҳаман атәылаҳра, уажә ҳаазқәылаз атәылаҳратә хәыцшьа ҳамам умҳәозар, иара ҳцәыӡыр, хыда инхаз аҧстәы шыҧсуа жәдыруеит, дук ҳазнеирым. Убри аҟынтә, иахьынӡауа Аҧсны ҳәынҭқарраны инхалароуп.
Иҟоуп аурысцәа рҟынтә ҳара иҳадаҳкылаз азыӡба еилызкааз, иҟоуп иззеилымкаазгьы. Иззеилымкааз рҟынтә иҟоуп иҵымҟьаз, аха иҵҟьаз, иҵҧаз, ҿҭыӡәӡәала ицәажәаз аурысцәа еиҳауп. Аиашазы, арҭ ауаа рхы ртәым. Уи урыстәылатәи ателехәаҧшра зхы еивнагаз уаауп. Иаҳҳәеит ҳәа, асҵәҟьа убахьоу, урыстәылатәи ателехәаҧшра ‒ ари узхәаҧшыр ҟамло, амца ацразҵо, мыцла еибарку маҵзуроуп. Уи сара сахәамҧшуеижьҭеи крааҵуеит, шәаргьы ахәамҧшраз ишәабжьазгоит.
Ды-Бжьаниоума, д-Шамбоума, д-Кәарҷиоума, иаацәажәаз, зҿахәы зҿырхыз, изыҿцәажәаз зегьы ирҳәаз акоуп: Аҧсны Урыстәыла иалалом, аха иалало Уаҧстәылаахыҵ иадгылоит, насгьы Аҧсны Урыстәыла ишадгылац иадгылаҩуп, Аҧсни Урыстәылеи еиҩызцәоуп, еишьцәоуп, даҽакалагьы изыҟалом.
Кавказ адырцәа, аҭҵааҩцәа иреиуоу Вадим Муханов «Газета.Ru» азҵаара аҭак ҟаҵо иҳәеит аҧсуа политикатә ҧызацәа Аҧсны ахьыҧшымра ишацәхьамҵуа, аринахысгьы, ааигәа-сигәа, иацәхьаҵрангьы ишыҟам.
Згәаанагара зҳәаз Адгәыр Арӡынба инаҵшьны иазгәеиҭеит Аҧсны шазхиоу Урыстәылеи Белоруссиеи реидгыларатә ҳәынҭқарра аҽадкылара.
Муханов излазгәеиҭо ала, Аҧсны зызхиоу аконфедерациатә форматуп. Аинтеграциатә еидгыларақәа рыҟны аҧсуаа рзы ихадоуп рхьыҧшымра, аха урҭ еилыркаауеит ҧынгылак змам ахьыҧшымра наӡа шыҟам.
Муханов «адыр», «аҭҵааҩы», «аеқсперт» ҳәа дшыҧхьаӡоугьы, изымдырқәогьы ыҟоуп аҧсуаа рзы. Аҧсуаа Урысәыла алалара ахаангьы ирҭахымызт ҳәа ииҳәо мцуп. Иҟан аамҭа Аҧсны Урыстәыла алалара ианазхиаз. Иахьеиҧш исгәалашәоит ажәлар Аҟәатәи реизара ари ахықәкала. Аха усҟан Урыстәыла Аҧсны адкылара иазхиамызт. Уажәазы урҭ азхиоуп, ҳара мап.