“Сез театрны мин яраткан шикелле яратасызмы, ягъни күңелегезнең бөтен көче, барлык энтузиазмы белән, бөтен чыгышыгыз белән яратасызмы?” Һәркемгә таныш булган әлеге сүзләрне, Лениногорск халык театрының һәр артистына карата кулланырга була. Бүгенгесе көндә труппаларында нибары бишәү генә булсалар да, һәр яңа спектакль уйналганнан соң, аларның кайсын гына алма - һәрберсе тамашачы күңеленә яңа бер зур ачыш булып үтеп керә.
Күптән түгел генә танылган шәхес, Лениногорскида яшәп иҗат иткән күпкырлы талант иясе, Рәшит Шиһап исемен йөртүче халык театры үзенең яраткан тамашачысы хозурына яңа премьерасын тәкъдим итте. Коллективның “Бирнәле кыз” кыз дип аталган моңсу комедиясе, җирле халык театрның 65 яшьлек юбилеена багышлап сәхнәгә куелды.
Лениногорск халык театры 65 ел буена берәмтекләп, кадерләп тупланган традицияләрне бүген дә бик кадерләп саклый. Ә аның беренче адымнары драма түгәрәге буларак 1957 елның көзендә, «Татбурнефть» трестының вышкомонтаж эшләре предприятиесе клубында башланып киткән. Ә 1958 елда язучы һәм драматург Габдулла Фәтхуллинның «Күзләр» драмасын сәхнәгә куюга ирешкән. Ул вакытта театр түгәрәге белән театр эшенә мөкиббән китеп иҗат итүче, бик талантлы кеше Наил Нуртединов җитәкчелек иткән.
Лениногорскида 7 ел эшләгәннән соң аны Түбән Кама шәһәренә чакырып алганнар, анда ул драматург, режиссер, артист буларак танылган, зур уңышларга ирешкән. Татарстан мәдәниятенә керткән зур өлеше өчен Наил Нуретдинов “Лучшие люди России” китабына кертелгән.
Соңрак мәдәният сараенда үзенең даими урынын тапкач, коллективы белән Марсель Зиннәтуллин, Рәшит Хәбибуллин, Рафис Сөләйманов, Әлфия Рәхмәтуллина, Рөстәм Кәнәфиев, Ильяс Әхмәтҗанов һәм башкалар җитәкчелек итә. Артистлар – Флера Шәйхетдинова, Исмәгыйль Игтисамов, Фәридә Шәкүрова, Энҗе Мусина, Мәдинә Сафиуллина, Флера Тәхауова, Салих Хәмәтҗанов, Рафис Сөләйманов, Лена Хәмәтҗанова, Мөгалиммә Сәмигуллина һәм башка бик күпләр үзләренең иҗат җимешләре белән сөендерә.
Лениногорскида театр үсешенә талантлы шәхесләребез Рәшит Шиһап һәм Мәдинә Сафиуллина – аерым зур өлеш керткән талант ияләре.
1983 елның көзендә «Идел йорт» төбәкара фестивалендә, коллектив Данил Салихов пьесасы буенча куелган «Кызлар капкыны» спектаклен тәкъдим итте. Әлеге фестивальдә Лениногорскилылар тамашачыларны һәм жюрины таң калдырды. Аларның уеныннан әсәрләнгән Индус Таһиров җитәкчелегендәге Лениногорск якташлыгы вәкилләре, шулай ук жюри әгъзалары, Галиәскәр Камал исемендәге Казан дәүләт театры артистлары Наил Дунаев, Гөлсем Исәнгулова һәм башка бик күпләр, артистларның, режиссерның таланты белән соклануларын белдереп, театр коллективына рәхмәт белдерделәр.
1989 елда Лениногорскида иҗат итүче коллективка халык театры исеме бирелде. 1990 нчы елда исә Лениногорск халык театры башкаланы кабат шаулатты - Бөтенроссия сатира һәм юмор фестивале лауреаты булды. Ул вакытта дүрт артисттан торган труппа Галиәскәр Камалның «Бүләк хакына» пьесасыннан өзек күрсәтте. Жюри рәисе Равил Шәрәфиев лауреат дипломын тапшырганда аларның уеннарын бәяләп: “Искиткеч уен өчен рәхмәт белдерәм. Лениногорскилылар, мондый артистлар булганда, бәхетле кешеләрдер дип уйлыйм”, - диде.
Лениногорск театры район авылларында да, башка районнарда да еш кунак булалар, Әлмәт, Нурлат, Бөгелмә аларны чыгыш ясарга бик еш дәшеп тора.
65 ел эчендә Лениногорск татар халык театры татар мәдәниятен үстерүгә, татар телен, рухи һәм милли кыйммәтләрне саклауга, татар драма сәнгатен үстерүгә зур өлеш кертте, әмма тарих моның белән генә төгәлләнми, сәхнә дип җан атып торган, бер-берсенә теләктәшлек күрсәтеп, театр дип янып яшәүче труппа аның өр-яңа битләрен яза.
Исламия Галимова
Тулырак: http://zamansulyshy.ru/news/leninogorsk-talantlar-tbge/leninogorsk-khalyk-teatry-btenrossiya-satira-m-yumor-festivale-laureaty