"Йӧратыме кочай" толын. #КОК ТӰНЯ

Фото Эрика Полатова

Изием годым мыйым Сергей кочай пешак йӧрата ыле. Ваче ӱмбакше шынден коштыктен.

1971 ийыште армий гыч толынам, а тиде жапыште кочай колен колтен. Толын шым керт. Толмеке шӱгарышкыжат миен омыл. Ик кеҥеж йӱдым омым ужынам.

Кас велеш лампе дене гына шинчем. Тулукеыле. Шкеже школ программе дене урокым ыштем. Тунемаш пураш ямдылалтам. Омса велым топ-топ шокта, вуем нӧлтальым, ончем, Сергей коча пӧртышко пура. Ош вуян, ош тувыр йолашан, йолыштыже ош тапычке. Коча мыйын велышке толеш. Мый йодым: "Кочай тыйже коленат вет? Вара молан мыйын велышке толат? Шого, шого ит тол». Кочай авагашта деран шогале. Мый умбакыже йодам: «Молан коштат?»

Кочай ойла.

- Ой уныкам, Юрик эргым, тыйым ужаш толынам. Армий гычын толынат, а шӱгарыш мый декем от тол. Ой, могай кугу марий лийынат. Мотор кап-кылан.

Мый йодам: "Шуко жап лият мо?"

Тудо манеш: "Уке каем веле. Мыйым шагатат пелылан веле колтеныт.

Мыйже йодам: «Тыге колтат мо?»

Тудо ешара: «Мемнан вет тыгак оза уло, йодат да колта».

Кочай савырныш да лектын кайыш.

Эрдене авалан ойлышым. Тудо кинде шинчалым погыш. Авай, мый да изи Валерий шольым шӱгарышке кайышна. Миен сортам чӱктышна. Кинде –шинчалым погышна. Уштен нална. Тидын деч вара коча омыштем толмыжым чарныш.

А меже кажне ийын 9 майлан да 2 августлан шӱгарышке коштына.