Հայաստանի և Ֆրանսիայի հարաբերությունները գտնվել և գտնվում են բարձր մակարդակի վրա։ Այս մասին «Հավակնություններ. Ֆրանսիա-Հայաստան» ֆորումի ընթացքում հայտարարեց վարչապետ Նիկոլ Փաշինյանը։
«Այս 30-ամյակը բնութագրվում է որպես առանձնաշնորհալ հարաբերությունների, վերելքի և սերտ հարաբերությունների ժամանակաշրջան։ Մենք՝ հայերս երախտապարտ ենք եղբայրական Ֆրանսիային անցած 30 տարիներին մեր հանրապետությանը ցուցաբերած անկեղծ ու անշահախնդիր աջակցության և հայ ժողովրդին ու նրա արդարացի ձգտումներին աջակից լինելու համար»,-հայտարարեց վարչապետը։
Անդրադառնալով տնտեսական կապերին՝ Փաշինյանն ընդգծեց երկու երկրների փոխգործակցության բարձր մակարդակը, և հատկապես Արցախյան վերջին պատերազմում Ֆրանսիայի ցուցաբերած տնտեսական և հումանտիտար աջակցությանը։ «Ուրախ ենք, որ պատերազմից հետո Ֆրանսիան քաղաքական կամք է դրսևորել՝ տնտեսապես աջակցելու Հայաստանին և նորովի խթանելու հայ-ֆրանսիական տնտեսական գործակցությունը»,-նշեց նա։
Վարչապետը կարևորեց հատկապես 44-օրյա պատերազմի և հետպատերազմյա շրջանում Ֆրանսիայի նախագահ Մակրոնի ցուցաբերած աջակցության համար։ «Նախագահ Մակրոնը միակն էր, որ հստակ ու անկողմնակալ գնահատական տվեց տեղի ունեցած իրադարձություններին։ Նույն կերպ կարևոր էին Ֆրանսիայի Սենատի և ԱԺ-ի՝ ի պաշտպանություն արցախահայության ընդունած բանաձևերը։ Ֆրանսիան մեծ դեր ունի նաև ԵԱՀԿ ՄԽ-ի շրջանակներում գործադրած ջանքերի տեսանկյունից»,-նշեց վարչապետը։
Լրացուցիչ տեղեկությունների համար այցելեք կայք