ДУОЛАР!
• Аллоҳим! Закариёни Яҳё билан хурсанд қилганингдек бизни ҳам солиҳ фарзандлар билан хурсанд қил!
• Аллоҳим! Юнусни балиқ қорнидаги торликдан чиқарганинг каби бизни ҳам ҳаёт торлиги ва қоронғуликларидан чиқар!
• Аллоҳим! Айюбга мусибатлари чоғида сабр илҳом қилганингдек бизга ҳам мусибатлар қаршисида сабр илҳом эт!
• Аллоҳим! Ийсони осилишдан қутқарганинг каби, бизни ҳам бандаларинг зулмидан қутқар!
• Аллоҳим! Юсуфни фитналар ва шаҳват ёмонликларидан ҳимоя қилганингдек, бизни ҳам дунё фитналари ва шаҳватларидан ҳимояла!
• Аллоҳим! Иброҳимга оловни салқин ва саломатлик қилганингдек, бизга ҳам дунё ва охират оловларини салқин ва саломат айла!
• Аллоҳим! Ҳабибинг Муҳаммад соллаллоҳу алайҳи васалламни тун қоронғусида сайр қилдириб, ойдин меърожга олиб чиққанингдек, бизларни ҳам жаҳолат зулумотларидан маърифат нурафшонлигига, нафсоний тутқунликлар хорлигидан розилигинг меърожига олиб чиқ!
• Аллоҳим! Абу Бакрнинг Умаридек дўст, Алийнинг Фотимасидек жуфт, Умматнинг Салоҳуддин Айюбийсидек саркарда... насиб эт!
• Омин!
• Омин!
• Омин!
• Эй махфий ва ошкора илтижоларни эшитувчи Зот!
• Эй бандаларининг сўровларини аралаштиб қўймайдиган Зот!
• Эй қуллик изҳори учун кўтарилган муҳтож қўлларни қуруқ қайтаришдан ҳаё қиладиган Зот!
• Авфингга ташна қалбларимизни мағфират ила қондир, раҳматинг тотли ҳаловатидан бизларни завқлантир!
• Муштдеккина бошимизда дунё қадар гуноҳ бор, буни тан оламиз!
• Аммо Сенинг мағфират эҳсонинг барча оламларни тўлдириб, тоширади, бунга ишонамиз!
• Биз ғариб, бечора, мискин қулларингга Ўзинг раҳм айла, тойилган пайтимизда Ўзинг қўлларимиздан тут!
• Золимлар зулмидан мазлумларимизни қутқар, ҳақ йўлдаги мужодаламизга Ўзинг нусрат бер!
• Сендан ўзга мададкоримиз, Сендан ўзга меҳрибонимиз йўқ!
• Омин!
• Омин!
• Омин!
АБРОР МУХТОР АЛИЙ!