Вучен шуктышым... #КОК ТӰНЯ

Ик рвезе каласкален.

Армий гыч толам, лач Азъял-Шале корно воктен волен кодым. Ялышке куржам ошкылам, куржам ошкылам. Чот вашкем. Мӧҥгӧ миен шуым, чемоданым пӧрт покшелан шындышым да вигак вавай деке толын шогальым. Койко воктеке сукалтен шинчым да ӧндал колтышым.

Вавай шортын колтыш, вара ойла: «Ой, Колю эргым, уныкам, пыкше вучен шуктышым. Ынде ласкан колен кертам. Тыйым вучен чонем лектын огеш керт».

Мый авамлан ойлем: «Ӱстембалым, кинде шинчалым погаш кӱлеш». Угыч савырнен вавай деке миен ончальым гын, шӱлымымат чарнен ыле.