Канцэртную праграму “Ганаруся табой, радзімая старонка” прадставілі самадзейныя артысты філіяла “Сольскі Дом культуры”. Мерапрыемства адбылося ў межах раённага агляду-конкурсу па ўсіх відах і жанрах аматарскай мастацкай творчасці “Распахнем акенца творчасці”.
“У кожнага чалавека ёсць родная старонка, край, дзе ён нарадзіўся і рос, дзе ён спазнаў першыя радасці і няўдачы. Усё ў ім да болю знаёма. Але бываюць імгненні, калі свой родны дом становіцца даражэйшым за ўсё на свеце. І мы звязваем паняцце чалавечага шчасця з вёскай, раёнам, вобласцю”, - менавіта гэтымі словамі вядучага і пачаўся канцэрт.
Мерапрыемства было напоўнена вершамі, песнямі і інструментальнымі музычнымі нумарамі. Сваім выступленнем парадавалі гледачоў удзельнікі гуртка сольных спеваў Таццяна Марыніна і Наталля Падбярозка, а таксама ўдзельнікі дзіцячага гуртка Лізавета Какауліна, Вераніка Рыбачонак, Аляксандра Ігнатовіч, Кацярына Рыбачонак, Дар’я Кабанец. Кіруе гурткамі Аляксандр Хвастэнка.
На канцэрце прагучалі самабытныя песні ў выкананні народнага фальклорнага калектыву “Валэйчанка” пад кіраўніцтвам Наталлі Гізулеўскай, сваё майстэрства прадставілі ўдзельнікі клуба аматараў хрысціянскай песні пад кіраўніцтвам Дануты Грынчук. Інструментальнымі нумарамі парадавалі піяністка Рэната Ланеўская і дамрыстка Аляксандра Палавінкіна. А найбольш апладысментаў прагучала пасля выканання фінальнай песні ўсімі ўдзельнікамі канцэртнай праграмы.