Ոչ մի դիվանագիտական սկանդալ Մինսկի և Երևանի միջև չկա։ Այս մասին հայտարարել է Բելառուսի արտգործնախարար Վլադիմիր Մակեյը չորեքշաբթի կայացած մամուլի ասուլիսի ժամանակ՝ մեկնաբանելով նախագահ Ալեքսանդր Լուկաշենկոյի հայտարարությունները Հայաստանի մասին։ Հայաստանում որոշ քաղաքական ուժեր, ըստ նրա, այդ թեմային «հիպերտրոֆիկ ուշադրություն» են դարձրել՝ հարցազրույցն ամբողջությամբ դիտելու փոխարեն։
«Այնտեղ ոչ մի հիշատակում չի եղել այն մասին, որ ինչ-որ մեկը ստիպում է ինչ-որ ինտեգրացիոն միավորման մեջ մտնել։ Ես ընդհանրապես չեմ հասկանում, թե ինչու է խոսքը գնում ինչ-որ դիվանագիտական սկանդալի մասին»,- ասել է Բելառուսի ԱԳ նախարարը։ Հիշեցնենք, որ Բելառուսի նախագահ Ալեքսանդր Լուկաշենկոն ասել էր, թե Բելառուսի և Ռուսաստանի Միութենական պետությանը կարող են միանալ հետխորհրդային տարածքի նաև այլ հանրապետություններ, «մեծ հավանականությամբ՝ նաև Հայաստանը»: Բացի այդ, Լուկաշենկոն հավելել է, թե Հայաստանը ոչ մի տեղ չունի գնալու և ոչ մեկին պետք չէ: «Մենք համոզված ենք, որ Բելառուսի նախագահի յուրահատուկ աշխարհաքաղաքական վերլուծությունը նպատակ է հետապնդում սպասարկել առաջին հերթին սեփական ներքաղաքական օրակարգը և ոչ մի կապ չունի Հայաստանի և նրա արտաքին քաղաքականության հետ»,- նշել է Բելառուսի ԱԳ նախարարը:
Իր հերթին ԱԺ փոխխոսնակ Հակոբ Արշակյանը, իսկ դրանից հետո ԱԳՆ ղեկավար Արարատ Միրզոյանը հայտարարել են, որ Ռուսաստանի և Բելառուսի Միութենական պետություն մտնելու հարց Հայաստանի օրակարգում չկա։ «Բելառուսի նախագահի յուրօրինակ հայտարարություններն առաջին անգամ չէ, որ հայտնվում են տարբեր երկրների գործընկերների ուշադրության կենտրոնում, այդ թվում՝ Հայաստանում։ «Մենք վստահ ենք, որ նման ձևակերպումներն ուղղված են Բելառուսի նախագահի ներքին օրակարգի սպասարկմանը»,- հայտարարել է Արարատ Միրզոյանը: