Икымше аклымашым калык ончыко лукнем. Таче 2021 ий 1 март.
«ШИЙ ПАМПАЛЧЕ» мюзикл
«Ший Пампалче» мюзиклын премьерыж годым икымше гана миенам ыле. 13 февральыште кокымшо гана ончаш коштым. Кок составшымат ужым.
Шке шонкалымаш-влакем тыште возынем. Вигак каласен, тиде мыйын шонкалымаш.
Кажныжым посна аклаш гын, кок тӱрлӧ спектакльым ончымыла чучеш. Икымше состав - йомак сынан ыле, а кокымшо - илыш деке лишкырак. Кокымшо ганаже «Ший Пампалчым» ончаш йоча-влак ятырак толын улыт ыле. Мюзикл мучашыште пеш келшыш манме шомакым шукак кольым.
Вӱдонын сӱанышке кайыше калыкым пеш оҥай ончыктеныт. Сем, куштымаш, фольклор сыным ушештара. А куштымашышт, кадыргылмышт лач гына улыт. Тиде самырык да йоча-влаклан пеш чот лишыл. Но шоҥгырак-влак нерым куптыр налын кертыт. Мыйын шонымаште гын, пеш чапле мумаш.
Режиссерын ик ходшо спектакль почеш огыл гае чучо. Вувер куват сӱанышке кая. А тудо спектакльыште пел тӱр гыч паленак лектеш. Лӱмын кучаш вучымо гае. Вачышкыже сӱан шовычым сакалташ да ик кок куплет мурым мурыкташ гын, кая ыле. «Ший Пампалче» мюзикл лач «Ший пӱян ший Пампалче» йомак деке лишыл лиеш ыле . Калык сайынрак умыла ыле.
Сӱан куштымаш-влак марий енлан лишыл улыт. Вет «Салика» спектаклят лач шке фольклор ужашыже да калыкын курым дене эрыкан илыш верч кучедалмашыже тӱжем гана ончаш таратыкта.
Теве образ-влак шотышто тыгай шонымаш-влак улыт.
1. Турийын образше ала кузе омытам чиктен шындыме гае веле чучеш.
2. Пеш кугу йӱкын сем йонга. Южгунамже пылыш чорым пудештара шонет.
3. Сюжет йомак почеш огыл. Легенде дене йомакым иктышке ушымо.
4. Ала молан йомак да илыш иктышке варналтыныт. Тышке куштылгын куснымаш да тушко уке.
5. Вӱдон пеш йомакысе, а Пампалче илыш деке лишылрак
Иктешлен тыге каласынем. Тиде спектакль содыки йоча да самырык еҥ-шамычлан лишылрак. Кугыеҥ-влаклан чылалан ик гана миен толаш темлем. Но келша гын 55 ганат ончыза. А йоча-влакым гын иктаж 3-4 ганаже намиен конден кертыда.
Мӧҥгыштӧ телевизор да интернетым ончен нимо уым огыда нал. Пытартыш вуйторыкда нер гыч йоген лектын пыта.
Спектакльым ОНЧЫЗА.