Ик сонарзын каласкалымыжым шарналтышым: «Леонид эргым, чот кугу языкан улам. Жап шуэш гын, вес тӱняш кайымем дечын ончыч орланашем логалеш. Рвезе годым лесниклан пашам ыштенам. Июль тылзыште шордым вашлийым, презыжым пукшен шога ыле. Мый нальым да лӱен шуышым. Шордо йӧрльӧ. Презе «шортеш», йӧсын ломыжеш, вуйжо дене аважым нӧлташ тӧча. Тудым чодырашке поктен колтышым.
Тидлан шуко жап эртен гынат, наказаний толын шуо вет. Германийыште службым эртымеке, эргым ешым погыде, самырыкак колен колтыш».
Сонарзыжат ынде шукертак уке лийын. Эртен кудалмем годым мутшо эре ушышко возеш, петырналтше сурт-печыже шинчамлан перна.