Тойымо годым шке чийыме вургемем чиктенам... #Кок_тӱня

Фото Валерия Скворцова

Яшкелде кочай каласкала. Тудо лач ик палымыж деч колын.

Ялыште ик марийым тояш мыят мийышым. Ончем, тоштырак тувыр, туржалтше броко дене чиктен пыштеныт. Чонемлан пеш лапка лие. Колышо айдемыже пеш пашаче, осалат огыл ыле.

Туларем ужатымашке толын ыле. Тудын дене тидын нерген кутырен шогылтна.

- Молан тыге шӱкшӱ вургем дене тоятше? Айда манам, мыйын ӱдыр налме костюмем так веле кеча, тудым чиктена.

Туларат тидын дене келшыш. Шуко шым шоно, кайышым кондышым да чиктен пыштышна. Каласыман, тунам авам да пелашем больницыште лийыныт.

Пошкудо-шамыч ойлаш тӱҥальыч.

- Тыге ышташ ой йӧрӧ. Тый денет иктаж мо лийын кертеш.

Тунамже пеш жал чучын да нимом шонен омыл. Ик жап эртымеке, шомак-влакым колыштын, лӱдынат кайышым. Шинчанужшо декат миен тольым. Тудын туныктен колтымыж семын шӱгарышке миен коштым, колышо деч сӧрвален йодынам. Йоча-влакем ончаш кӱлеш, нимат ит ыште манынам.

Но ынде 18 ий эртен, ала коштмем полшен, ала нимат тыгайже укеат, так тӱрлӧ окмакланымаш гына, тачат илем.

Каласыман кызыт тиде ушем дене тыге ом ыште ыле дыр. Умыленам, тыгай годым, лучо уым налын пуаш. Шулдаканым гынамат лиеш, но уым.

Эше теве ик марийын каласкалымыже ушешем тольо. Тудат ялысе пагалыме еҥын, туныктышын тойымашкыже толын. Изиш пыштышырак лийын. Ужеш, колышылан тошто картузым чиктен пыштеныт. Тидет шуко шоныде колотка деке толеш да пелешта:

- На Иваныч, мыйын сайынракем чие. Тыйын тоштет дене шке коштам.

Налеш да вашталта. Тиде томаша деч вара жап шуко эртен. Тудат таче ила.

Тыге ышташ лиеш але уке? Тыгай томаша лийын каен гын, мом ыштыман? манын южгунам ушешем толеш.

Ала иктаж кӧ весе тыгайым шарналта. Шке вашмутшым пуа.