«Унчышко тулан йолгорно» спектакльышке миен коштым.
Кайыме годымак рекламе-влакым ужын нерым куптыртыл тарванышым. Но… шонымаш дене ужмо ойыртемалтше лийыч. Каласыман сай велышке.
Василий Пектеевын ямдылыме сценарий негызышкыже Унчо школ туныктышо Анастасия Федоровна Ласточкинан возен кодымыжо пышталтын. Марий ӱдырамаш кок изи икшыве дене немыч-влакын налме мландыште кодеш. Кузе йоча-влак дене илен лектын кертын? Но тиде чынжымак лийын...
Кӱчык аннотацийым лудым да спектакльым ужын ӧраш веле кодеш. Марий ӱдырамаш тыгайым чытен лектын да эше тидым возен. Вет шукыж тидым мондаш да сар нерген весылан каласкалаш тыршен огытыл. Вашкерак уш гыч луктын кудалташ манын шоненыт. Тыгай еҥ-влак шке возымышт дене угыч шарныктарыктат да воктелнак лиймышт дене война жапысе пагытым ушештарат да лишемдат. Нигӧм огына мондо, нигӧ ок мондалт сар деч варасе мут сайын тыгай годым ушыш толеш. Шарнена, палена, огына мондо манын шонымаш эшеат пеҥгыдемеш.
Мый тыште ешартыш семын каласынем ыле. Лач Унчо кундемын вес ӱдыржо Роза Салах сар жапысе пагытым тыгак пеш сайын шке книгалаштыже ончыктен. Куанен каласаш лиеш. Шке кундемыштым шарныктарак да кугешнаш таратыктат ӱдырамаш-влак. Но таче Салах нерген огыл.
Спектакль тичмаш образ дене сай. Шижалтеш тӱҥалтыш да мучаш уло. Но ончымеке содыки ала мо кӧргыштӧ огеш сите манын шоналтышым. 48 минут кайыме жап шагалрак чучо. Материал уло да ешараш лиеш ыле дыр. Изиш кумданрак почын пуаш. Лач тыгай жапым йӧча-влаклан шындыме годым кучылтыт. Нуно шуко шинчен огыт турко.
Мый видеосо кадр-влак дене артист-влакын шомакыштдене изи «нестыковкым» ужым. Т-34 танкым война деч ондакысе жапыште ончыктат. Но тидым шукышт огыт умыло. И огыт шеклане.
Артист-влак тыршат. Мом манаш «профи». Образ-влак оҥай улыт.
Но спектакль пеш кӱчык манын каласышым. Театрым ужынат от шукто. Спектакль ала кушто кӱшно кая. Кӱзет, кӱзет, кӱзет, шинчет да лектын кает. Театрын шӱлыжымат шӱлалтен от шукто. Ваш-ваш мутым вашталташ йӧн уке. Мылам тиде ыжак келше.
Но ик палымем деч спектакль нерген возаш йодым да тудо тыгерак сералтыш. Палемдыман, тиде ялыште илыше ӱдырамаш возен.
"Унчышко тулан йолгорно "драме келшыш мыланем, чыным ойлаш гын, тыгай сынан спектакльым ончаш йӧратем."Йӧратем" манам гын кугун шокта чай. Сар жапым калык нигунам ок мондо. Александрова Светлана шке рольжым пеш сайын чонен. Кушто шыргыжальым, а куштыжо шинчавӱдат лекте. Артист-влак дене ик тулан йолгорно дене эртышым, ик шӱлыш дене ончышым.
Вот тыгайрак культпоход да спектакль нерген шонкалымаш-влак лийыч.