Цæгат Ирыстоны сæргълæууæг Сергей Меняйло бацархайдта Уæрæсейы хицауады Координацион советы президиумы коронавирусы фарстаты фæдыл æмбырды. Видеобастдзинады руаджы йæ амыдта бæстæйы хицауады сæрдар Михаил Мишустин. Архайдтой дзы федералон министрадты æмæ ведомствæты разамонджытæ дæр. Æрдзырдтой омикрон-штаммимæ тох кæныны мадзæлттыл. Хицауады сæрдары ныхæстæм гæсгæ Уæрæсейы ковид-госпиталты рынчынты нымæц нæ фæфылдæр.
Фæлæ ног уылæнмæ хъæуы цæттæ уæвын. Регионты разамонджытæн бабар кодта хъус дарын рынчындæтты æмæ тагъд æххуысы службæты куыстмæ. Дохтыртæн, раздæрау, æххуыс кæндзысты медицинон ахуыргæнæндæтты студенттæ æмæ бархионтæ. Ног штаммæй чи рынчын кæна, уыдон фылдæр сæхи дзæбæх кæндзысты амбулаториты.
Уымæ гæсгæ, сæйрагдæр хъæуы æркæсын фыццаг медицинон æххуысы цæттæдзинадмæ. Михаил Мишустин ма куыд загъта, афтæмæй коронавирусимæ ныхмæ фæнд кæнынц рахай кæнын уæлæмхасæн фæрæзтæ. Регионтæ ковидæй дзæбæхгæнæн хостæ балхæнынæн райсдзысты 5 млрд сомы. Куыд раздæр, афтæ ныртæккæ дæр ахсджиаг у низ рагацау сбæрæг кæнын. Уый фæдыл хъæуы цæрджытæн тестытæ кæныны хъуыддагыл бакусын.
—
#irystontv #Осетия #Алания #ОбществоОсетии #итв_общество #ОсетияИрыстон #НовостиОсетии #Ossetia #Alania