Кужу урвалте #Кок тӱня

Шижде урвалте мучашыжым тоя дене мландеш кыра. Каяш тарвана, а тоя огеш колто.

Кугурак ийготан калык Фадейкино ял гыч кутыреныт.

Ик рвезе тиде ял гычак империалистический, вара гражданский сарыште лийын. Мӧҥгӧ пӧртылын. Кастене пошкудо марий-влак чумыргеныт, вашлийме лӱмеш подылыныт. Вараже йылмышт рудалт каен. Рвезе ойла: "Ош тӱняште юмо уке, лиеш гын тынар калыклан ойгым огеш кондо ыле. Шукын эр кече ваштареш сукен кумалыт, вара атака деч вара колышо кият. Мые кумалын омыл. Ужыда вет, илыше пӧртылынам. Ынде нимо дечат лӱдмашем уке, кавалерийыште служитленам».

Подылшырак пошкудо-влак ойлат: «Нимо деч от лӱд? Айда пелйӱдлан часамлашке кае да вот тиде тоям керын тол. Вара ме ӱшанена».

Рвезет кая, тоям чот гына перен шында. Но имнешке-влакын шинель урвалтышт кужу лийын. Шижде урвалте мучашыжым тоя дене мландеш кыра. Каяш тарвана, а тоя огеш колто. Эше ик гана шӱдыралеш. Тыгак пеҥгыдын шинель урвалтым кучымо. "Колтыза-а-а" манын кычкырал колта. Шӱмжӧ лӱдмыж дене шогалеш, верешыжак пурен кая. Пошкудо-влак вучат, вучат, а салтак уке. Мият часамлашке, а тудо колышо кия. Вот кузе тиде тӱня гыч каяш пӱрен улмаш.