Hurmatli professor-oʼqituvchilar, ota-onalar va qadrli talaba-oʼquvchilar diqqatiga!
Xabaringiz bor (https://t.me/eduuz/7642), 2021 yil 24 dekabrda davlatimiz rahbari tomonidan oliy taʼlim tizimini tub ijobiy oʼzgarishlarga olib keladigan oliy taʼlim muassasalariga moliyaviy, akademik va tashkiliy-boshqaruvda mustaqillik berish borasidagi 2 ta tarixiy qaror imzolandi. Bu bilan esa – Oʼzbekiston oliy taʼlim tizimida yangi davr boshlab berildi.
Qaror (https://lex.uz/docs/5793251) bilan 2022 yil yanvarь oyidan boshlab respublikadagi eng salohiyatli 35 ta oliy taʼlim muassasalariga moliyaviy mustaqillik berilishi – bu boradagi vazifalarni sifatli tarzda amalga oshirish va hozirdanoq mustahkam poydevor yaratishni talab etadi.
Bu oʼz navbatida, oliy taʼlim muassasalari boshqaruvida yangicha tizim asosida yondashuvni talab etadi.
Shu maqsadda, oliy taʼlim tizimi tarixida ilk marotaba – rektorlar, prorektorlar, dekanlar va moliya masalalariga masʼullar uchun oʼz kasbiy mahoratini oshirish, yangicha tartibda ishlashni boshlash maqsadida joriy yil 10-24 yanvarь kunlari amaliy seminar-treninglar tashkil etiladi.
Shu bilan birga, oliy taʼlim muassasalari kredit-modulь tizimiga toʼliq oʼtganligi sababli kafedra mudirlari va professor-oʼqituvchilari uchun asosiy ishdan ajralgan holda oʼquvlar barcha oliy taʼlim muassasalarida, tashkil etiladi.
Bu jarayonga oliy taʼlim muassasalari huzuridagi barcha professional taʼlim muassasalari hamda akademik litseylar rahbarlari ham jalb etiladi.
Yuqoridagilardan kelib chiqib, 2021/2022 oʼquv yilining ikkinchi yarmini toʼliq va puxta tayyorgarlik koʼrgan holda boshlash maqsadida oliy
va professional taʼlim muassasalari, akademik litsey talaba-oʼquvchilari uchun qishqi taʼtil muddati 2022 yil 24 yanvarga qadar uzaytirildi.
Oʼz navbatida, qishki taʼtil davrida oliy va professional taʼlim muassasalari, akademik litseylar talaba-oʼquvchilarining vaqtini mazmunli oʼtkazish maqsadida oliy taʼlim muassasalari rektorlari hamkorligida onlayn fan olimpiadalari, intellektual viktorinlar tashkil etiladi.
Barcha yoshlarimizni ushbu tadbirlarda ishtirok etib, oʼz salohiyatlarini namoyonda qilishga chorlab qolamiz!
Talaba-oʼquvchilarga oʼz uylaridan taʼlim muassasalariga qaytishlariga qulay shart-sharoitlar yaratish maqsadida avia hamda temir yoʼl chiptalari tarif qismidan 50 foiz miqdorida chegirma berilishi muddati ham 2022 yilning 24 yanvariga qadar uzaytirildi.
Va asosiysi – 2022 yilning 11 yanvarigacha boʼlgan muddatga xarid qilingan avia va temir yoʼl chiptalari bepul tarzda tegishli muddatga almashtirib beriladi.
Mazkur masalalarni muvofiqlashtirish maqsadida Vazirlikda Maxsus shtab tashkil etilgan boʼlib, barcha tashkiliy masalalar yuzasidan quyidagi ishonch telefonlariga (10-06, 71-246-97-45, 71-246-28-63) murojaat qilishingiz mumkin!