Аҟәа, декабр 29 – Аҧсуа университет, Алхас Чхамалиа. 85 шықәса ҵуеит диижьҭеи Аԥснытәи аҳәынҭқарратә университет ҳаҭыр зқәу апрофессор ҳәа ахьӡ зыхҵаз, аҵараиурҭа азиндырратә факультет аҿы аполитологиеи асоциологиеи ркафедра аԥҵара ахыҵхырҭаҿы игылаз, анаҩс уи напхгара азҭоз, еицырдыруаз аҵарауаҩ, асоциологиатә ҭҵаарадыррақәа рдоктор, аполитик, Кавказ ажәларқәа Рконфедерациа ахадас иҟаз, Аԥсны Афырхаҵа Иури (Муса) Магомед-иԥа Шанибов.
Иазгәаҭатәуп, ари арыцхә инамаданы ААУ аполитологиеи асоциологиеи ркафедраҿы инарҭбаау аусмҩаԥгатә аиҿкаара ргәы ишҭаз, аха атәылаҿы ишьақәгылаз аепидемиологиатә ҭагылазаашьа уадаҩ иахҟьаны уи амҩаԥгара залыршамхеит.
Иури Шанибов ҵарауаҩк, политикк иаҳасабала иааникыло аҭыԥ, насгьы уи Аԥснытәи аҳәынҭқарратә университет аполитологиеи асоциологиеи ркафедра ашьақәгыларҿы илагала дазааҭгылоит акафедра аиҳабы, афилософиатә ҭҵаарадыррақәа ркандидат, адоцент Емма Гамсаниаԥҳа.
«Сара даара насыԥ ҳаман ҳәа исыԥхьаӡоит Иури Магомед-иԥа Шанибов иеиԥш иҟаз ауаҩ нага, даара аҵара змаз азиндырҩы, асоциолог, атеоретик дуӡӡа, аԥышәа ӷәӷәа змаз аполитикатә усзуҩы иҿы аусура ахьҳақәшәаз. Аԥсны жәлар Рџьынџьтәылатә еибашьра анеилга ашьҭахь Аԥснытәи аҳәынҭқарратә университет аҿы аполитологиеи асоциологиеи ркафедра еиҿызкааз иара иакәын, напхгарагьы аиҭон. Аамҭа цәгьазы аусуҩцәа зегьы еизигеит, еидикылеит. Аха нас, иҷкәын иганахьала агәаҟра данақәшәа, аамҭала Нальчикҟа дцоит», – лҳәеит Емма Гамсаниаԥҳа. Лара лажәақәа рыла уи ашьҭахь, ААУ аректор, академик Алеко Гәарамиа ибзоурала, ҩаԥхьа ауниверситет ахь дхынҳәуеит.
«Иури Магомед-иԥа имчала акафедраҿы даара аҵак ду змаз аҭҵаарадырратә усурақәа мҩаԥааго ҳалагеит. Еснагь ибзиан иара иполитикатә хәыцшьа, итеориатә знеишьа: иарбан зҵааразаас ишьҭихуазаалакгьы, аҳәынҭқарраҿы имҩаԥысуаз апроцессқәа роума, зегьы анализ рзиуан, ҭҵаарадыррала дазнеиуан. Имоуп акрызҵазкуа имаҷымкәа аусумҭақәа. Аԥснытәи аҳәынҭқарратә университети Ҟабарда-Балкариатәи ауниверситети русеицура иабзоураны, иҭыжьуп иара иусумҭақәа еидызкыло 7-шәҟәык. Аҵарауаҩ иҭиҵаауан, еиҿирԥшуан аԥхьагылара змаз америкатәи, европатәи асоциологцәа, атеоретикцәа рԥышәа. Иаргьы ҵарауаҩк иаҳасабала адунеи аҿы деицырдыруан ҳҳәар, имыцхәхом. Излаадыруа ала, афранцыз социолог ду Бурдио иуадаҿы икнаҳан Шанибов ипатреҭ. Ари иҳанаҳәо даараӡа ирацәоуп», – лҳәоит Гамсаниаԥҳа.
«Еиуеиԥшым аамҭақәа раан Аԥсны иҟалоз акризистә ҭагылазаашьақәа ирызкны ажәахәқәа, ааԥхьарақәа маҷымкәа иҟаиҵахьан, раӷьырак рнуп иара ишәҟәқәа. Урҭ дыртәуп, ирыԥхьалатәуп, еиҭарыԥхьалатәуп, ҩаԥхьаҟа гхак ҳмыхьразы. Избан акәзар, аҳәынҭқарра иахәаша азҵаарақәа аахтны иҳәон, иԥышәа дуун, атрибун дуӡӡа ҳәа ззырҳәоз иакәын. Азҵаарақәа дрызнеиуан инарҵауланы, азиндырра, асоциологиа, афилософиа уҳәа рыла иҭҵааны», – иазгәалҭеит акафедра аиҳабы.
Ааԥынразы, аепидемиологиатә ҭагылазаашьа иалнаршар, ргәы иҭоуп Аԥснытәи аҳәынҭқарратә университет аҟны Иури Магомед-иԥа Шанибов изку аҭҵаарадырратә конференциа амҩаԥгара.
«Ҳкафедра аусура аплан инақәыршәаны, ҳгәы иҭоуп аҵарауаҩ ибзианы дыздыруаз, аамҭак ицаныз ауаа хатәрақәа адгаланы аконференциа амҩаԥгара, иаҳҳәап, Аконфедерациа аиҿкаараан иарӷьажәҩаны ивагылаз ауаа – Геннади Аламиа, Сергеи Шамба уҳәа егьырҭгьы алархәны. Сгәы иаанагоит, урҭ иҳарҳәаша рацәаны ирымоуп ҳәа», – лҳәеит Емма Гамсаниаԥҳа.
Иазгәаҭатәуп, Иури Магомед-иԥа Аԥсны жәлар рмилаҭ-хақәиҭратә қәԥара аҭоурых аҿы илшамҭақәа ахәшьара рыҭара шуадаҩу. Аԥсуа зҵаара иадҳәаланы абахҭагьы дҭаркхьан, аха игәҭакы анагӡараҿы акгьы дааннакыломызт.
«Сара рацәак салалом Иури Магомед-иԥа иполитикатә усура, Аконфедерациа аганахьала иџьабаа уҳәа. Егьырҭ зегь ҳарҟәаҵып, иаҳгәалаҳаршәап Аԥсны аибашьра ианалага иара қарҭаа рганахьала ииҳәаз ажәақәа: «Кавказ зегьы Егры ҳшышәԥыло жәдыруаз!» – аригьы иҳанаҳәо даараӡа ирацәоуп. Уи ҳажәлар амч ду рнаҭеит», – лҳәоит Гамсаниаԥҳа.
Иури Шанибов иԥсҭазаара аҵыхәтәантәи ашықәсқәа рҟынӡа Аԥснытәи аҳәынҭқарратә университет дамадан, лассы-лассы арахь даауан, дырԥылон астудентцәа: алекциа дырзаԥхьон, имҩаԥигон асеминарқәа.
«Аԥхьаҟа гәҭакыс иҳамоуп Иури Магомед-иԥа Шанибов изку аԥхьарақәа ауниверситет аҿы реиҿкаара. Кавказ зегьы иалыхәхәа иааигоз, ҭҵаарадыррала ишьақәырӷәӷәаны иҳадигалоз иидеиақәа ԥсра рықәӡам. Урҭ ҳҿар иҵегьы иаднаԥхьалартә аҭагылазаашьа аԥаҳҵароуп», – иазгәалҭеит Емма Гамсаниаԥҳа.