Бала сағын бер ҙә генә иҫләргә яратмай Гөлфиә. Ни өсөн тигәндә, дүрт йәше тулыр тулмаҫтан, әсәһе уны өләсәһе ҡарамағына ҡалдырып, өс бала менән тол ҡалған иргә кейәүгә сығып китте. Өләсәһе иһә "йәшел йылан" менән дуҫ ине, шунлыҡтан өҫтәлдә йүнле ризыҡ, кейергә рәтле кейеме лә булманы Гөлфиәнең.
Ҡупшы ҡурсаҡ кеүек тиҫтер ҡыҙҙарынан айырмалы, бысрағына ҡатып, башы бетләп урам ҡыҙырғанын иҫләп, әле лә күҙҙәренә йәштәр төйөлә. Уның ҡарауы, әсәһе барған иренең балаларына яҡшы әсәй булып йәшәне лә китте, тағы ике малай тыуҙырҙы. Ул-ҡыҙҙарын муллыҡта үҫтереп, барыһын да юғары уҡыу йорттарында уҡыттылар. Гөлфиәгә генә был ғаиләлә урын табылманы.
Мәктәпте тамамлағас, артабан уҡыу теләге ҙур булһа ла, мөмкинлек юҡ ине шул. Эсеүенән арына алмай, өләсәһе лә баҡыйлыҡҡа күскәйне. Гөлфиәгә үҙ йүнен үҙенә күрергә тура килде. Күрше ауылдағы колхоз фермаһына һауынсы булып урынлашты. Шундағы егеткә кейәүгә сыҡты. Ире бик дыуамал, әммә эшкә шәп. Яҙмышым ошолор, тип барыһына ла күнде ҡатын. Арыу йәшәйҙәр, ҙур итеп йорт һалдылар. Өс балаға ғүмер бирҙеләр, улары ла башлы-күҙле инде хәҙер, ейән-ейәнсәрҙәре килеп шатландырып тора.
Шулай йәшәп ятҡанда, әсәйең дауаханала, хәле ауыр, оҙаҡламай сығаралар, барып алығыҙ, ҡарарға кеше юҡ, тигән хәбәр килде. Өҫтөнә ҡайнар һыу килтереп ҡойҙолармы ни, Гөлфиә был хәбәрҙән шаңҡып ҡалды. Быуындары тотмай, урындыҡҡа барып ултырҙы. Нисек ҡарар һуң уның күҙенә, кисерә алырмы әсәһен?.. Уйҙарына батып, үткәндәрҙе күҙ алдынан үткәреп күпме ултырғандыр, иҫләмәй ҙә Гөлфиә… Шунан йәһәтләп тороп, дауаханаға тип сумка йүнләй башланы. Әсәһенә бер көн килеп кәрәк булыуынан йөрәге дарҫлай ине ҡатындың.
...Бала саҡтан күңелендә йыйылған үпкәләрен онотто Гөлфиә. Әсәһен яҡшылап тәрбиәләп ҡараны, ошо ҡыҫҡа ғына ваҡыт эсенә йөрәгенең бар йылылығын биреп ҡалырға тырышты. Ҡыҙғанысҡа ҡаршы, әсәһе оҙаҡ йәшәмәне, ике ай эсендә бөтөнләй һүнде. Тик һуңғы һулышына тиклем ҡыҙына сикһеҙ рәхмәтле булыуы уның ҡарашынан да һиҙелә ине. "Ғәфү ит, балам..." - тине ул һуңғы һулышында ла...
Фото: murmansk.bezformata.com
Автор: Миләүшә Сайтакова