Նիդերլանդների ԱԳՆ-ն հայտարարել է Լաչինի միջանցքի իրավիճակի վերաբերյալ ՄԱԿ-ի Միջազգային դատարանի որոշման կատարման կարևորության մասին:
«Կարևոր է, որ այդ պարտավորեցնող իրավական հանձնարարականը կատարվի և Լաչինի միջանցքով մարդկանց, տրանսպորտային միջոցների և բեռների անարգել շարժն ապահովվի Ադրբեջանի կողմից», - ասված է նախարարության Twitter-ի գրառման մեջ:
ԱԳՆ-ն նաև հույս է հայտնել, որ «մոտ ժամանակներս» կվերսկսվեն Հայաստանի, Ադրբեջանի և ԵՄ-ի միջև եռակողմ հանդիպումները՝ նշելով, որ լիովին աջակցում է ԵՄ-ի ղեկավարության ներքո ընթացող բանակցային ջանքերին:
Ավելի վաղ Եվրամիությունը կոչ էր արել Ադրբեջանի իշխանություններին կատարել ՄԱԿ-ի Միջազգային դատարանի որոշումը և բացել Լաչինի միջանցքը
ՄԱԿ-ի Միջազգային դատարանը փետրվարի 22-ին ժամանակավոր միջոցներ է ձեռնարկել Լաչինի միջանցքի ապաշրջափակման վերաբերյալ Հայաստանի հայցի վերաբերյալ՝ պարտավորեցնելով Ադրբեջանին ձեռնարկել իրենից կախված բոլոր միջոցները՝ ապահովելու համար Լաչինի միջանցքի ամբողջ երկայնքով մարդկանց, տրանսպորտային միջոցների և բեռների անարգել տեղաշարժը:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախում ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ:
Արցախի կառավարությունը հայտարարել է, որ ժամանակավորապես դադարեցնում է հանքի շահագործումը. որոշում է կայացվել դիմել միջազգային կազմակերպություններին՝ «Բեյզ Մեթըլս» ընկերության գործունեության հետ կապված միջազգային էկոլոգիական փորձաքննություն իրականացնելու համար: