Փետրվարի 21-ին ԱԽ քարուղար Արմեն Գրիգորյանը և ՀՀ պաշտպանության նախարարի տեղակալ Արման Սարգսյանն ընդունել են ԵՄ արտաքին գործողությունների ծառայության քաղաքացիական գործողությունների հրամանատար Ստեֆանո Տոմատի գլխավորած պատվիրակությանը:
Ողջունելով ԵՄ նոր քաղաքացիական մշտադիտարկման առաքելության ժամանումն ու պաշտոնական մեկնարկը Հայաստանում՝ ԱԽ քարտուղարը վստահություն է հայտնել, որ այն կշարունակի նպաստել մեր տարածաշրջանում կայունության և խաղաղության հաստատմանը:
Ստեֆանո Տոմատը շնորհակալություն է հայտնել հայկական կողմին ԵՄ քաղաքացիական առաքելությանը ցուցաբերած աջակցության համար և ներկայացրել Հայաստանում իրենց կողմից իրականացվելիք աշխատանքները:
ՀՀ պաշտպանության նախարարի տեղակալ Արման Սարգսյանի հետ հանդիպմանը քննարկվել են Հայաստանում ԵՄ մոնիտորինգի առաքելության գործունեությանն առնչվող հարցեր։ Երկուստեք կարևորվել է առաքելության դերը սահմանային կայունության և անվտանգության ամրապնդման գործում։
Փետրվարի 20-ին ԵՄ խորհուրդը հայտարարել է Հայաստանում քաղաքացիական առաքելության մեկնարկի մասին։ «Առաքելության օպերատիվ շտաբը կտեղակայվի Վայոց ձորում՝ Եղեգնաձորում»,- նշվում է հաղորդագրության մեջ։ ԵՄ դիվանագիտության ղեկավար Ժոզեպ Բորելը ավելի ուշ հայտնել էր, որ Հայաստանում ԵՄ դիտորդական առաքելությունն իրականացրել է իր առաջին պարեկությունը։ «Մենք գործարկել ենք Հայաստանում ԵՄ առաքելությունը (EUMA), որն այժմ գործում է և այսօր իրականացրել է իր առաջին պարեկությունը։ EUMA – ն կնպաստի մարդկանց անվտանգությանը, կամրապնդի վստահությունը տեղերում և կաջակցի ԵՄ-ի ջանքերին Հայաստանի և Ադրբեջանի միջև խաղաղ գործընթացում»,- գրել էր նա։