Әлеуметтік маңызы бар азық-түліктің бағасы көтерілмеуі тиіс. Тұрақтандыру қорындағы өнім мөлшері әр апта сайын қалалық әкімдіктің және құзырлы басқарма өкілдерінің назарында, деп хабарлайды Qazaqstan Media тілшісі.
«Солтүстік» әлеуметтік-кәсіпкерлік корпорациясының сауда орындарында әлеуметтік маңызы бар 19 тауардың 15-і сатылады. Биыл тұрақтандыру қорына өнімді арзан бағамен сатып алуға бюджеттен 3,5 млрд теңге бөлінген. Тұрақтандыру қорының облыс орталығында және аудандар бойынша 7 сату орны бар. Басты міндет – азық-түліктің қымбаттауына жол бермеу. Қазір корпорация қорында 15 мың тоннаға жуық азық-түлік бар. Оларға: май, жұмыртқа, қарақұмық, күріш, қант және тағы басқа өнімдер кіреді.
«Облыс әкімінің тапсырмасымен аптасына 4 рет тұрақтандыру қорында азық-түлік бағасына, мөлшеріне бақылау жүргіземіз. Қала супермаркеттерінде аптасына 3 рет, ал сейсенбі-бейсенбі күндері аудан дүкендеріне барамыз. Қордағы азық-түлік маусым айына дейін жетеді. Олардың басым бөлігі – сәбіз бен қырыққабат. Ал пиязды сақтау мерзімі – 6-7 ай болғандықтан, қордағы өнім сәуір айына дейін сақталады», -дейді «Солтүстік «ӘКК» АҚ тұрақтандыру қорының жұмысын ұйымдастыру департаментінің директоры Роза Тастамбекова.
Тұрақтандыру қорының өнімдері әдеттегіден 25-30% – ға арзан. Сондықтан әр апта сайын тауардың бағасы мен қолжетімділігі тексеріледі.
