Վարչապետ Նիկոլ Փաշինյանը Մյունխենի խորհրդաժողովում պանելային քննարկման ժամանակ հայտարարել է, որ Լաչինի միջանցքն արդեն 70 օր արգելափակված է մնում։ Փաշինյանն ընդգծել է, որ Լեռնային Ղարաբաղում այժմ հումանիտար և էներգետիկ ճգնաժամ է՝ շրջափակման և էլեկտրամատակարարման դադարեցման պատճառով: Նա նշել է, որ գազամատակարարումը Ղարաբաղ դադարեցվել է շրջափակման ընթացքում առնվազն 10 անգամ։
«Սա խնդիր է, որը պետք է լուծել։ Մեր դիրքորոշումն այն է, որ 2020 թվականի նոյեմբերի 9-ի եռակողմ հայտարարության մեջ կան շատ հստակ դրույթներ՝ կապված Լաչինի միջանցքի հետ, և ըստ այդ հայտարարության՝ ադրբեջանցի և ռուս խաղաղապահները պարտավոր են ապահովել Լաչինի միջանցքի գործունեությունը, բայց հիմա, ցավոք, մենք բոլորովին այլ իրավիճակ ունենք։ Եվ ես նկատի ունեի նաև Լաչինի միջանցքը՝ ասելով, որ միջազգային ուշադրությունը պետք է սևեռվի այս իրավիճակի վրա, որովհետև մենք մտավախություն ունենք, որ այս իրավիճակի շարունակությունը կարող է հանգեցնել անդառնալի հումանիտար հետևանքների Լեռնային Ղարաբաղի հայերի համար», – ասել է վարչապետը։ Պատասխանելով Ադրբեջանի նախագահի այն հայտարարությանը, թե ««Լեռնային Ղարաբաղ» արտահայտությունն այլևս անվավեր է», Փաշինյանն ընդգծել է, որ Լեռնային Ղարաբաղի և Լաչինի միջանցքի մասին ասվում է 2020 թվականի նոյեմբերի 9-ի եռակողմ հայտարարության մեջ, որի տակ կա Ադրբեջանի նախագահի ստորագրությունը: «Մենք ունենք Լեռնային Ղարաբաղը եռակողմ հայտարարությամբ, և մենք ունենք Ադրբեջանի նախագահի ստորագրությունն այդ փաստաթղթի տակ։ Եվ մենք ունենք Լաչինի միջանցք, որը պետք է լինի ազատ գործող և, ըստ եռակողմ հայտարարության, Ադրբեջանի վերահսկողությունից դուրս», – ասել է Փաշինյանը։ Վարչապետը հիշեցրել է Լեռնային Ղարաբաղից երեխաների հետ տեղի ունեցած միջադեպի մասին, որոնք Լաչինի միջանցքով Ստեփանակերտ էին վերադառնում ադրբեջանական շրջափակման սկսվելուց հետո: «Նրանք կանգնեցվել են և դիմակավորված ադրբեջանցիները ներխուժել են ավտոբուս։ Երեխաները գոռում էին, և սա Լեռնային Ղարաբաղի հայերի վերջին փորձն էր ազատ անցնել Լաչինի միջանցքով», – հայտարարել է Փաշինյանը։ Արձագանքելով Ղարաբաղում «ոչնչացված մզկիթների» մասին Ալիևի խոսքերին՝ Փաշինյանը հայտարարել է, որ խորհրդային տարիներին Ադրբեջանում ոչնչացվել է 1560 մզկիթ, ինչպես նաև եկեղեցիներ ու մզկիթներ ոչնչացվել են խորհրդային տարիներին նաև Հայաստանում։
Փաշինյանն ադրբեջանական պատմվածքն անվանել է«շատ վտանգավոր»։ Նրա խոսքով՝ տպավորություն է ստեղծվում, որ Ադրբեջանը փորձում է կրոնական ենթատեքստ տալ ամբողջ իրավիճակին։ Նշելով, որ դա «շատ վտանգավոր է», Փաշինյանն ընդգծել է հակամարտությունում կրոնական ենթատեքստի բացակայությունը, ինչպես նաև հիշեցրել է Հայաստանում մահմեդական փոքրամասնության և գործող մզկիթի գոյության մասին: Վարչապետի խոսքով՝ ադրբեջանական կողմից կապիտուլյացիայի նման «գրեթե վիրավորական ձևակերպումների» օգտագործումը կարող է տպավորություն ստեղծել, որ Ադրբեջանը ցանկանում է ցույց տալ, որ այժմ վրեժխնդրության քաղաքականություն է վարում: «Գուցե սա պատմական հանդիպում է։ Բայց ինչ նպատակով ենք ուզում օգտագործել այն: Մեր տարածաշրջանում անհանդուրժողականություն, ատելություն, ագրեսիվ հռետորաբանություն հրահրելու համար, թե հակառակը՝ մենք ցանկանում ենք օգտագործել այս հարթակը իրավիճակը բարելավելու համար։ Մենք կարծում ենք, որ այդ հարթակը պետք է օգտագործել կառուցողական նպատակներով», – ասել է Փաշինյանը։
Կառավարության ղեկավարի խոսքով, հայկական կողմի տեսանկյունից լուծումը ժողովրդավարությունն է, թափանցիկությունը, երկխոսությունը, ինչպես նաև հարգանքը տարածաշրջանի բոլոր երկրների նկատմամբ: Մյունխենի անվտանգության համաժողովը մեկնարկել է փետրվարի 17-ին, որի աշխատանքը կտևի մինչև փետրվարի 19-ը: Համաժողովի աշխատանքներին մասնակցում է Հայաստանի պատվիրակությունը՝ վարչապետ Նիկոլ Փաշինյանի գլխավորությամբ:
Լրացուցիչ տեղեկությունների համար այցելեք կայք