Իրանում մեկնարկել են Իրանի Իսլամական հեղափոխության պահապանների կորպուսի (ԻՀՊԿ) ՀՕՊ և ռազմաօդային ուժերի, ինչպես նաև օդատիեզերական ուժերի վարժանքները, հաղորդում է ИРНА-ն: Գործակալության տեղեկություններով` զորավարժություններն անցկացվում են երկրի հյուսիս-արևմուտքում, արևմուտքում, արևելքում, հարավում, հյուսիսում և կենտրոնում:
Tasnim գործակալությունը հայտնել է, որ զորավարժությունները կտարածվեն Իրանի օդային տարածքի երկու երրորդի վրա։ Զորավարժությունների հիմնական փուլի ընթացքում պլանավորվում է գիշերային պայմաններում մշակել երկրի կարևոր միջուկային և ռազմական օբյեկտների պաշտպանության մարտավարությունը: Զորավարժություններին կմասնակցեն մոտ 100 օդաչուավոր և անօդաչու ինքնաթիռներ։
Գործակալության տվյալներով` զորավարժությունների ընթացքում իրանցի զինվորականները ցուցադրել են ստորգետնյա թունելներ, որոնք օգտագործվում են զենիթահրթիռային համալիրների պահպանման համար: