Արցախի պետնախարարի խորհրդական Արտակ Բեգլարյանը հայտարարել է, որ Արցախի շրջափակման պատճառով Ադրբեջանում 96 հազար հեկտար հողատարածք բավարար քանակությամբ ջուր չի ստանա: «Արցախի շրջափակման հետևանքով Սարսանգի ջրամբարի մոտ 600 մլն խմ տարողությամբ ջրային ռեսուրսները կրճատվել են, ինչը գարնանը և ամռանը լրջագույն ճգնաժամ կստեղծի առաջին հերթին ադրբեջանցի հողագործների համար, քանի որ բավարար ջրային ռեսուրսներ չեն լինի», - ընդգծել է Բեգլարյանը: Նրա խոսքով՝ դա կանդրադառնա Ադրբեջանի Թարթառի, Աղդամի, Բարդի, Գերանբոյի, Եվլախի և Աղջաբադի շրջանների հողերին։
Պետնախարարի խորհրդականը հիշեցրել է, որ Բաքուն, հունվարի 9-ին դադարեցնելով Հայաստանից դեպի Արցախ էլեկտրաէներգիայի մատակարարումը, ինչպես նաև պարբերաբար ընդհատելով գազի մատակարարումը, միտումնավոր հրահրում է էներգետիկ ճգնաժամ։ «Այս ընթացքում Սարսանգի ջրամբարի ջրային ռեսուրսները խիստ սպառվել են, քանի որ մեր գլխավոր ՀԷԿ - ի աշխատանքի համար մենք արտադրել ենք ավելի շատ՝ 50 մեգավատ հզորությամբ ջրային ռեսուրսներ, քան դրանք մտնում են Սարսանգ», - նշել է նա։
Բեգլարյանը իրավիճակը կրիտիկական համարեց. «Ադրբեջանի այդ շրջանների բնակիչները պետք է գիտակցեն, որ իրենց իշխանությունների և ինքնահռչակ կեղծ ակտիվիստների պատճառով այս տարի չեն ունենա բավարար քանակությամբ ոռոգման ջուր և կզրկվեն սնունդ և եկամուտ ստանալու այդ կարևոր հնարավորությունից» ,- ընդգծել է պետնախարարի խորհրդականը:
Արցախի նախագահի մամուլի քարտուղար Լուսինե Ավանեսյանն ավելի վաղ հայտնել էր, որ Ռուսաստանի և Բաքվի միջնորդությամբ պայմանավորվածություն է ձեռք բերվել վնասված ցանցի վերանորոգման և առաջիկա օրերին Հայաստանից էլեկտրաէներգիայի մատակարարման վերականգնման մասին, հիշեցրել է Բեգլարյանը: «Պարզ տրամաբանությունը հուշում է, որ որքան շուտ վերականգնվի Արցախի էլեկտրամատակարարումը, այնքան ավելի շատ ոռոգման ջուր կունենան ադրբեջանցի հողագործները սեզոնին», - եզրափակել է պետնախարարի խորհրդականը:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախում ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ:
Արցախի կառավարությունը հայտարարել է, որ ժամանակավորապես դադարեցնում է հանքի շահագործումը. որոշում է կայացվել դիմել միջազգային կազմակերպություններին՝ «Բեյզ Մեթըլս» ընկերության գործունեության հետ կապված միջազգային էկոլոգիական փորձաքննություն իրականացնելու համար:
Հաագայի դատարանը ժամանակավոր միջոցներ էր ձեռնարկել Լաչինի միջանցքի ապաշրջափակման վերաբերյալ Հայաստանի հայցի մասով՝ պարտավորեցնելով Ադրբեջանին ձեռնարկել իրենից կախված բոլոր միջոցները, որպեսզի ապահովվի Լաչինի միջանցքի ողջ երկարությամբ մարդկանց, տրանսպորտային միջոցների և բեռների անարգել տեղաշարժը։ Դատարանը մերժել էր նաև Հայաստանի նկատմամբ ժամանակավոր միջոցներ կիրառելու վերաբերյալ Ադրբեջանի հայցը։