Республикæйы сæргълæууæг Сергей Меняйлойы амындæй ацыд антитеррористон къамисы æмбырд. Сæйрагдæр бæрнон куджытæ æрдзырдтой ахуырады объектты æдасдзинадыл.
Регионы разамонæджы ныхæстæм гæсгæ, ууыл кусын хъæуы æппынæдзух. Националон гвардийы управленийы разамонæг Валерий Голота куыд зæгъы, афтæмæй ахуыргæнæндæттæ æмæ рæвдауæндæттæ лæмбынæг басгæрстой. Сæрмагондæй 9 мæймæ Алагиры, Дыгуры, Æрæфы æмæ Кировы районты скъолатæ сифтонг кодтой æнæхъæлæджы уавæры эвакуацигæнæн системæтæй. 11 скъолайы сæвæрдтой видеоцæстдарды системæтæ, 33 -йы та – æвæстиатон хъусынгæнæн фæрæзтæй.
Валерий Голотæйы ныхæстæм гæсгæ, срæмыгъды мæнг хъусынгæнинæгтæ цы скъолаты фæдыл æрбацыд, уым специалисттæ раиртæстой аиппытæ. Хæстæгдæр рæстæг сæ дзуапдæттæг кусджытæ аиуварс кæндзысты. Ахуырад æмæ наукæйы министрады куыд фехъусын кодтой, афтæмæй ацы æмæ иннæ ахуырадон азмæ рахай кодтой 85 милуан сомæй фылдæр.
Уыдоны фæрцы бакуыстой æдасдзинады къабазы райхалинаг фарстатыл. Зæгъын хъæуы уый, æмæ барадхъахъхъæнджытæ терроризм æмæ экстремизмы ныхмæ профилактикон мадзæлттæ æдзух кӕнынц.