Ռուսաստանի և ԱՄՆ-ի՝ Սիրիայի հետ կապված իրենց պարտավորությունները չկատարելու ֆոնին Թուրքիան կձեռնարկի բոլոր անհրաժեշտ քայլերը՝ Սիրիայի տարածքում ահաբեկչության սպառնալիքը վերացնելու համար: Այդ մասին չորեքշաբթի Անկարայում Նիկարագուայի իր գործընկեր Դենիս Մոնկադա Կոլինդրեսի հետ համատեղ ասուլիսում հայտարարել է Թուրքիայի արտգործնախարար Մևլութ Չավուշօղլուն, հաղորդում է Anadolu-ն: Նրա խոսքով՝ վերջին շրջանում Սիրիայի հյուսիսում ավելացել է YPG / PKK- ի «ահաբեկիչների» հարձակումների թիվը: Նա ասել է, որ Սիրիայում հակաահաբեկչական գործողություններից առաջ YPG / PKK-ի գրոհայինները կրակել են Թուրքիայի տարածքի ուղղությամբ, այդ թվում՝ ականանետերով: «Վերջերս մենք կրկին սկսել ենք արձանագրել նման հարձակումներ: Հեռավորությունը, որից կրակում են Թուրքիայի սահմանամերձ շրջաններ, առավելագույնը 30 կմ է: Եվ դա չնայած այն բանին, որ Սիրիայում, այդ թվում՝ «Եփրատի վահանը» գործողությունների սկսվելուց հետո մենք որոշակի պայմանավորվածություններ ձեռք բերեցինք ԱՄՆ-ի և Ռուսաստանի հետ: Երկու երկրները պարտավորվել են ահաբեկիչներին դուրս բերել Թուրքիայի սահմանից Սիրիայի տարածքում 30 կմ խորությամբ: Մոսկվան նաև պարտավորվել է ահաբեկիչներից մաքրել Սիրիայի Թալ Ռիֆաթ և Մյունբիչ թաղամասերը: Ցավոք, այդ խոստումները չեն կատարվել»,- ասել է նա: Չավուշօղլուն ընդգծել է, որ Ռուսաստանը և ԱՄՆ-ը, խախտելով իրենց խոստումները, պատասխանատվություն են կրում խաղաղ սիրիացիների և թուրք զինվորականների վրա ահաբեկչական հարձակումների համար: Ահաբեկչական հարձակումների աճի և Սիրիայի նկատմամբ պարտավորությունների չկատարման ֆոնին Թուրքիային մնում է ինքնուրույն լուծել հարցը, ասել է Չավուշօղլուն:
Լրացուցիչ տեղեկությունների համար այցելեք կայք