Күптән түгел социаль селтәрҙә бер оҫтаның мунсаны “ҡурсаҡтай” итеп эшләүен күреп, әйберҙәрен ҡарап, бигерәк маһир икәнлеген аңланыҡ. Бөгөн гәзит уҡыусыларҙы Баймаҡ районының Үрге Иҙрис ауылында йәшәгән балта оҫтаһы Һатыбал Данъяров менән таныштырырға булдыҡ.
Кеше берәй нәмә менән ныҡлап мауыға башлаһа, “Был тиклем дә булмаҫ, ауырыйҙыр ул”, – тиҙәр. Ысынында иһә ағас эшенә мөкиббән киткән, ағас “сире” йоҡҡан һөнәрмәндең был шөғөлдө үҙ итеүе уйламағанда килеп сыға.
Һатыбал Рәсүл улы Октябрҙең 50 йыллығы исемендәге колхозда оҙаҡ йылдар тракторсы була. Колхоз тарҡалғас, күптәр кеүек бәхет эҙләп ситкә китмәй. Күңелендә йөрөткән, әммә ваҡыты булмау сәбәпле ҡулы теймәгән яратҡан шөғөлөнә – ағастан әйберҙәр эшләргә тотона. Тәүҙәрәк арба тәгәрмәстәре яһап һата, аҙаҡ йорт йыһазына тотона. Бар күңел йылыһын биреп, матур һәм сифатлы итеп эшләнгән әйберҙәрҙе һатып алыусылар ҙа тиҙ табыла. Ауылдаштары, оҫталығын күреп, үҙҙәре килеп заказ бирә башлай. Шуныһы иғтибарға лайыҡ: Һатыбал Данъяровтың бер әйбере икенсеһенә оҡшамаған, шуға күрә һәр береһе эксклюзив тигәндә лә була. Өҫтәл-ултырғыстар, гөл ултыртыу өсөн кәштәләр, һандыҡ йәки карауат – барыһы ла күҙҙең яуын ала. Икенсенән, сифатлы ағастан яһалған әйберҙәргә бөгөн ихтыяждың ҙур булыуын иҫәпкә алғанда, оҫтаға заказ биреүселәр ифрат күп. Шулай уҡ һуңғы ваҡытта күптәргә түңәрәк формалағы өҫтәл оҡшай. Ә уны үҙеңә кәрәкле ҙурлыҡта заказ бирергә мөмкин. Күп кенә мәсеттәргә мулла өсөн ултырғыс эшләүҙе лә һорайҙар икән. Әйткәндәй, Һатыбал Рәсүл улы үҙ ауылындағы иман йортона үҙенсәлекле ултырғыс яһап бүләк иткән.
Итексе итеккә йәлсемәй, тигәндәй, күп осраҡта үҙенә тигән әйберҙәрен дә һораусы булһа, һатып ебәрә ул.
Үрге Иҙрис ауылы оҫтаһы һуңғы ваҡытта мискә кеүек түңәрәк мунса һалыуға тотонған. Был яңы төр мунсаға заказ биреүселәр йәй осоронда бермә-бер артҡан. Эше бер аҙ мәшәҡәтлерәк булһа ла, ихтыяж булғанда, әлбиттә, отошло”, – ти оҫта. Ҡатыны ла иренә бар яҡлап ярҙамлаша, буяу эштәрен күберәк ул башҡара.
Атанан күргән – уҡ юнған, тигәндәй, Һатыбал Рәсүл улына ағас эшенә оҫталыҡ атаһынан күскән. Ағай, үҙе әйтмешләй, бәләкәйҙән ҡулына бысҡы тотоп, төрлө ағасты бысып йөрөгән. Атаһының эшләгәнен күреп, ҡасандыр үҙе лә уның кеүек һөнәрмән булырға хыялланған малай әле белгәндәрен балаларына өйрәтә. Кем белә, бәлки, уларҙың күңелдәрендә лә атай-олатайҙарының шөғөлөн дауам итерлек дәрт-дарман барҙыр. Теләк һәм дәртең булғанда, бар эште лә атҡарып сығырға була.
Автор: Кәримә Усманова.
