Хьана кьван хьанач кьван са тама сик1.
Чаз виридаз чида, сик1 гьи жуьре гъурчаз фидат1а. Амма ина авайди маса кар тир. Сик1рен зегьле физвай, вичи гьикьван калтугар-катнар ийида; са кап фу т1уьн патал гзаф яларна к1анзвай.
Эгер тама туьквенар авайт1а, куьн захъ инанмиш хьухь, и сик1ре гьанай недай зат1ар къачуз, вичиз секиндаказ яшамиш жедай.
Чи хабарда авай сик1 пара кагьулвили кьунвай, вич ч1урун тама яшамиш жезвайт1ани.
Амма тама эгер вуна т1уьн тавурт1а амайбуру вун вич неда, гьавиляй сик1 вичин фу регьят ийидай рекьерихъ къекъвезвай.
Сик1ери вуч недайди я? Кьифер, ничхирар, верчер, къуьрер ва маса куьлуь гьайванар.
Акъваз, сик1резни кьве гаф вичин патай лугьуз к1ан хьана виридаз:
🦊 Им мах ят1ани, ви рик1елай фенван , тамара верчер авачирди?
Кьиф кьуна тух жедани, адал алайди са т1уб як я, къуьрер кьаз пара четин я, абур зиринг гъвеч1и фад юзадайбур я.
🦊 Вун ацукьна шегьерда, вири гьазурдал кеф ягъиз вердиш хьанва, килигдай зун, вавай и тама кьил акъуд жедат1а. Вавай гьич кьве югъни ина яшамиш жез жедачир.. "
К1араб куф алай сик1 я, зи хъел аваз закай лугьудай гафар мад амай, ша чун килигин инлай кьулухъ вуч хьанат1а.
Вири махара сик1ер амалдардаказ къалурда, абуру гьи кардай хьайит1ани кьил акъудда. Гьавиляй чи сик1рени вич къуьр хьиз къалурдайвал хьана, гьабурун сихилдик экеч1 авун паталди.
Адаз къуьрен хамни жагъана вегьена вичел , япарни дуьзарна фена вичин фикир кьилиз акъудиз.
- "Вучтин гуж хьана заз, аман
Амач зи рик1из гьич дарман
Кьиникьдихъ вил акъвазна
Азар беденда амазма
Залумди вичин къайдада
Хизан зи авуна терг
Амукьна зун дуьньядал тек
Жанавур, вун хьуй гьа вак
Атканайт1а ви чанда квак
Чан балаяр ава са т1алабун
Зун ч1ехи буба хьиз кьабулун
Аялдин ванцихъ гала зи вил
Яхъ ман кьузуь къуьрен куьне гъил
Захъни яргъи уьмуьр амач
Гьич зарафатдивайни за к1ас гудач."
Къуьрерин хзандин иесияр фенвай к1вализ недай векь-кьал емиш гъиз. Гъвеч1ибурухъ галаз тунвай чпин ч1ехи руш - къуьр.
- "Ч1ехи буба, ша вун к1вализ
Гьелбетда, ваз гуда чна гъил
Ацукь дуьз вун-къерехдал ваъ
Жеда и к1вале вазни чка
Ч1ехи бубадик дарихмиш тир
Залум сик1ре вегьена к1ир
Тапасра вични аткана
Тифти цавуз акъатна".
Ц1ек1уьд къуьрен шараг гьалтна кьузуь къуьрел, чпин ц1ийи ч1ехи бубадал, къугъунрикни ам кутуна, хвешила чпини къати ц1угъар - ц1ирер язвай, гьа вири дуьньядин аялри хьиз.
Сик1ре фикиррай шарагарни дадлу тир, амма адаз як алай еке ч1ехи къуьр нез к1анзвай.
Мад икьван сес эхиз хьанач , вичин кьил пад жез хьиз авай.
Къахчуна вичин лашни, зурзаз-зурзаз хъыртыш хьиз фена рак1ар патав.
- "Аман чан хтул эх жедач мад
Фида къецел зун ахъайна рак
Аял-ц1угъарвай хьанва яргъа
Вердиш хьун патал герек я вахт"
- "Гурц1улар, т1имил ая сес
Ша ч1ехи буба, вегьида ваз мес
Мад ван ваз инай къведач
Гьада кьада к1еви са капач"
- "Сагърай вун хтул, мажбур авач
Юзурда за жуван гъил-к1вач
Ша инихъ, кьуьзек тур на рекье
Ахпа вач жув к1валин къенез"
Факъир чиг жегьил къуьр фена сик1рехъ галаз къецел, гьасятда сик1ре амна т1уьна ам.
Къуьрен хамун аявални хъувуна тадиз ам вичин к1вализ хъфена аялрин сесерикай ял ягъиз.
Яраб ада вичи авур кардикай вуч фикир ийизват1а, ша чна хабар кьада сик1ревай.
🦊 "За авур кар дуьзди туш, им заз чида. За пара алчах кар авуна.
За жув чан авачир кьуьзуьди хьиз къалурна, тапарарна язухар кутуна, к1вализ гьахьна, чиг къуьрни т1уьна.
🦊 Амма мадни за лугьуда, эгер квехъ хьиз ина туьквенар авайт1а, зани физ гьанай къачудай жуваз ем.
Чиг къуьре пухъ т1уьна зун к1вализ тухвана.
А жуьре чин тийидай кас к1вализ теклиф ийидай зат1 ян, к1вале ч1ехибурни авачир вахтунда?
Гила заз ял ягъиз к1анзва, хъвач, эхкъеч1 зи махунай, сагърай куьн."
Акунан квез сик1ре лагьай жуьре, бат1улни масабур хьана, вич ваъ.
Гьавиляй, гьуьрметлу къуьрер, мукъаят хьухь куьн квелни куь балайрал, ихьтин сик1ер дуьньядал гзаф ала.
Гьа инал махни куьтягь хьана, сагъ хьый куьн.