Хьана кьван хьанач кьван кьве къунши. Кьведни верчерал машгъулбур тир.
Сада як маса гузвай, муькуьда - какаярни ц1иц1ибар. Ят1ани садаз сад так1ан тир.
Са къуншидихъ са гзаф терс амалрин верч авай. Им маса верчерихъ кекерихъ галаз демекда яшамишзвай. Ибуруз иесиди сим агална бахчада чкани дуьзарнавай, къекъвез таза хъчариз к1уф авун патал.
Са къарикай са юкъуз и верчрев симен парудай са к1ац1 жагъана, им анай катна фена.
Акъатна им муькуь кьуншидин гьаятдиз. Им акатна адан верчерив. Абурувни вири бахча вуганвай. Гьинихъ к1андат1а, гьанихъ вач. Т1уьнни ибурун дадлу гъери алай хъсанди тир. Вечре пехилдаказ фикирзавай:
- ибурухъ авай гегьенш майдан аку-е, ибурухъ авай т1уьн аку-е. Чи иесиди чун дустагъда хуьзва.
Инавай верчери какаяр хазвайбур тушир. Хъсандаказ иесиди ибуруз т1уьн гуз хуьзвай, ахпа тук1ваз маса гузвай.
Гьелбетда и кардикай верчерин халкьдиз хабар тушир.
Вечрез инаг акьван бегенмиш хьана, гьар юкъуз къвез хьана.
А иесидиз акуна къуншидин верч атанвайди вучиз лагьайт1а жинс масад тир.
Хъел аваз зенгна ада муькуь къуншидин, кк1идай багьна тир герек:
- и жуван хейратдин аявал ая ина атканвай, тахьайт1а за адакай авуна шуп1а неда!
- Вун гьамани галаз кьий! Адан к1арабни ви туьтуьна ак1урай. Заз зенгермир мад! Къунши туш са завал я ваа...!
Ик1 лагьана ам телефон хкудна к1вачера авай кацелай гъил элягьаз ацукьна фикирариз. Кацини вичиз са зат1уникайни хабар авачир амаларна, мурмурарна.
Нянихъ идаз хтай верч акуна.
- я верч, вун мукъаят хьухь. А къуншиди зенгна чидахъ галаз къалар авуна, валай шикаятар авуна, вичин бахчадихъ къвезва лугьуз. Вичи вакай шуп1а ийида лугьузвай.
- я кац, вун са азабни алачиз чими к1вале нез - къаткуз, амалдардаказ фу къуьтуьлар ийиз жуван, ана вакай лап семе хьанва. Зун иесидиз хийир гузвай верч я. Зун хьтинди т1уьн ахмакьвал я. За какаяр хазва, абур иесиди маса гузва ва адаз пул жезва а кардикай. Эгер маса тагайт1а акъудна ц1иц1ибар жезва. Гьинихъ килигайт1ани хийир я зун...
- Вууу я верч, заз вуна закай ин жуьре фикирзавайди чизвачир. Зун гила семе ян? За ваз жуваз ван атай ихтилатдикай хабар гана рик1ин михьивилел. Вуна заз ик1 лагьанатани заз ви кьилел дуьшуьш атана канзвач.
- сагъхьуй чан кац, багъишламиша на зи гафар. Вуна рик1ик кьамир, за кьил акъудда и кардай.
- Верч, вун ягъалмиш жезва. Са ваз са гаф ахъайин. А касди чи иесиди хьиз какаярни ц1иц1ибар маса гузвач, ада верчерин як маса гуз пул къачузва. Кьат1унан вуна за вуч лугьузват1а, верч?
- Вири хъсан жеда, кац, сагъхьуй вун!
Вечрез ихьтин гафар гьич аяр аквазвачир. "Идакайни зат1 хьана заз рекьер къалурдай" лугьуз, фикирзавай вичи вичикди, демекдиз хъфидайла.
Демекдин рак1арив киц1 ацукьнавай.
- Вун гьар къуз куьчейра вучиз авайди я? - авна киц1и.
- Зун вахъ къекъвез шумудра фена. Гагь вун ина аквада, гагь квахьда!
Ваз иесиди т1уьн вуч патал гузва?
Гьина ава ви какаяр?
Киц1из вечре гьуьрметзавай, кич1ени тир адахъай. Алакьайла вичелай демекда хъиткьер (шолар) авай какаяр хьайила абур киц1из хгузвай.
Киц1изни им амай верчерилай пара к1андай. Гьавиляй верч квахьиз эгеч1айла адаз пис хьанвай.
Вичин дуст хьиз кьунвай ам.
Арабир ада Вечрез лугьудай:
"Верч, вун киц1ерикай тирт1а, са геренни акъваз тувуна вун за жуваз пабвиле къачудай, акьван вун заз хуш я".
Вири демек к1ват1 хъувурлай кьулухъ, мич1и хьайила киц1и вечрез къацал эверна, ибур вуч крар я лагьана хабар кьуна.
- Чан киц1, за ваз гзаф гьуьрметзава, амма завай кисна акъвазиз жедач. Чи иесиди чун ст1унни багьани туш, герекни. Ваз а къуншиди гузвай т1уьнар верчериз, абурухъ авай кьван мензилдин чка акурт1а, ваз аламат жеда. Бахча туш, са багъ я. Заз гьана гзаф бегенмиш я. Зун аниз фида. Ана авай верчеринни заз ша лугьузва.
- Верч, вун кими ян, ят1а дили? А касди зенгна чи иесидиз вичи вун неда лагьана! Вун мад анихъ физ алахъзаван? Кациз вичин япаралди и ихтилатар хьена, заз хълана. Зани ваз акьул гузва. Вуна игьтиятвал хуьх, анрихъ къвемир.
- Кац кьве чин алай амалдар кац я. Ви вилик ваз к1ани гафар лугьуда, масадан вилик - гьадаз к1ани.
- я верч, а касди тук1ваз верчер абурун як патав гвай базардал маса гузва. Гьафтеда кьведра ам физва парни яна машиндиз....
- ада белки кьуьзуьбур я жал ман тук1урбур. Заз чида, ада зак кян тавун патал, вучдат1а. За фена адаз какаяр хада жезмай кьван гзафдаказ. Ада са къайгъанах т1уьрлай кьулуxъ, зун галай патахъ гьич чуькьни хъийидач.
- ахмакь жемир вун, верч. Як нез вердиш хьанвайда ви какайрикай вучда?
- зун килигда, дуьз жедат1а, киц1, сагъхьуй вун.
Вечре и кар фадлай кьилиз акъудзавай. Са шумуд кака масадан демекда ханвай. А як1ун жинсинин верчерни вичел гьейран авунвай. Гьавиляй лап дамах гвай.
И демекда дустар пайда хьайила ида абурувай хабар кьуна.
- ярушар, дуьз гафар яни куьчейра авай, куь иесиди куьн тук1ваз маса гузван?
- абуру пехилдаказ лугьузвай гафар я. Чи иесиди чун хуьзвай жуьреда хьиз мад садни хуьзвач, гьавиляй ахьтин кими ихтилатар лугьузва - хиве кьунач и ц1ийи вечрен дустари.
Са ц1усад кака авай мукай садлагьана квахьна абур. Гьанлай вилик иесини демекдиз атанвай. Вечрез чир хьана, ада абур къахчурди.
- Ма зи чка инаг я - лагьана, хвеши хьана.
Гьа гьи юкъуз и къуншиди мугьманар гуьзлемишзавай. Идан папани к1вале михьивалар авуна, недай зат1арин дуван ийизвай.
- Вач, чан итим, туьк1вендиз. Магь и чардал за вири кхьена.
- Исятда футбол ава, жув вач ман.
- Зах вахт авач. Виш квалах ама хъувуна герек. Ахпа салатни торт ама захъ гьазур туширбур.
- Тортдиз авай какаяр беса. Верчерни чи гьаятдал ала, фена къачу, гьим к1андат1а ваз.
- Ви верчер лап ягълубур я, салатдиз дуьз къведач. Какаяр т1имил кутурт1а бисквит къарагъдач. Зун дили ийимир, итим!
- Уффф, къалмакъалчи дишегьли - хъверна итимди - за лагьайвал ая вуна. Верчни фена гъида за ваз.
Фена им демекдиз сифте килигиз. Килигайт1а къуншидин верч мука ава, вичин к1аникни кьуд кака ква.
Вечрез лап хуш хьана, и ц1ийи иесидиз вич кардик кваз акурлай. Гьавиляй ам мукалай катни авунач, къалуриз к1ан хьана, ибур вичин зегьметдин какаяр тирди.
- Кьейи папан бахт аку я - фикирна итимди - вуч к1ан хьайит1ани, дуьз жеда ман, гьич санани авачир какаярни жагъана..
Къужахда верч, гъилени какаяр аваз ам вичин папан патав хъфена, абур вахкана, вични футболдиз килигун давамарна...