- Аман, зун и дам кими, кьил ч1урубрин арада гьик1 хьайиди яя! - хъел аваз къаргъишар ийиз инсанриз хъфизвай рекьяй вичин к1вализ Ц1имп1ит1ан.
- Я Ц1имп1ит1ан, хъел аван мад? - хъверна къунши папа.
-Эхь! Мад куьн хьтинбурун арада хвеши жедан?!
Ц1имп1ит1ан фена къуншидин цлалай килигна.
- Вуна вуч ийизва? Пекер куьрсарзван ц1илел?
К1амаш, пекер аста пад къецел куьрс ийидай зат1 я.
Вири квез лагьана к1андан?
Вун итимди вуч лагьана хуьзва?
Я ухшар алач, я фу чраз жедач, я пек чхиз жедач!
Къунши паб ц1ийиз рак ахъайна пекер къужахда кьуна гваз къецел экъеч1навай.
И гафар хьайила адан чин ч1ур хьана.
- Ваз хъел къвемир, чан къунши свас, за талгьайт1а ваз, мад ни лугьуда?
К1анида ви чина лугьуда, кьулухъай рахадач.
За вични ч1уру гаф лугьудач, вахъ рик1 кузвайвиляй лугьузвайди я.
Ц1имп1ит1анан кефияр ачух хьана вичин миресдал кьил элягьиз фидайвал хьана.
Рекье лежбер акуна кьве кал вилик кутуна физвай рехъ кьуна.
Ц1имп1ит1ана бегьемдиз салам гана, фена калариз килигна.
- Аман, вуч усал калер я! Яхунвал аку чпин, к1арабарни экъиснава, рекьверни хкатнава.
Ваз хъел къвемир стха, ихьтин гьайван хьун иесидиз айиб я!
Акьул гъана чиниз, гафар лагьана, гьерекатна Ц1имп1итана вилик.
Лежбер ц1ийиз базардай калер къачуна хквезвайди тир. Ц1имп1итанан гафар хьайила, ида вичикди са т1имил гьайиф хьана, ибур къачуна лагьана.
Ц1имп1ит1ана вич виридалай акьуллуди яз гьисабзавай.
Чидач, эгер Ц1имп1ит1анни адан ихтилатар авачирт1а, дунья гьик1 яшамиш жедайт1а.
Ц1имп1итана гьар юкъуз вичизни масабурузни ик1 лугьудай -
бес са вичиз вири к1анзва,
са вичи виридахъ рик1 кузва, амайбуруз хьайи-
тахьайдакайни хабар туш.
Гьавиляй вац1ун патавай фидайла Ц1имп1ит1ана лагьана:
- Я вац1, вун маса патахъ авахьна к1анда, вучиз лагьайт1а муькуь патазни яд к1ан я.
Вуна ви жемятдиз куьмек авуна к1анда. Гьикьван дагъ кьуру жеда?
Дуьзендиз яд бес хьанва, гила вач дагълухъвилихъ. Вуна менфят гъваш инсанриз!".
Инсандин ч1алал рахазвай ван атана вич акъвазнавай муькъуьн к1аникай.
- Вун вуч акьуллу кас я, Ц1имп1ит1ан. Ви гафарни дуьзбур я, крарни.
Исятда зун элкъвена, маса патахъ авахьда.
Ц1имп1ит1анан псис кул хьтин чуру квай чене виниз акъатна.
Са т1имил инлай вилик уьгъриди са к1валяй чуьнуьхарна, катнавай. Вац1ун патав атана ида вичиз бегенмиш тушир зат1ар циз вегьиз гьазур хьанвай. И арада инсан рахадай ван атана. Тадиз муькъуьн к1аник гьахьна им секиндиз ацукьна, вич акун тавун патал. Ахпа Ц1имп1ит1анан сес чир хьайилай ида жувабар гуз эгеч1на.
- Чан Ц1имп1ит1ан, заз ви куьмек галачиз четин жеда. Вуна инихъ эвич1на къалура ман заз, гьик1 яд маса патахъ тухудат1а, заз чидач хьи бес.
Ц1имп1ит1аназ дамах акатна, вичиз хъел атай хьиз чин авуна эвич1на гъил вац1ук кутуна яд гьинихъ-гьанихъ ийиз лугьуз хьана.
- Ингье вун исятда и патахъ физван, гила вун а патахъ вач.
Далудихъ ацукьна вац1уз серенжемар къалурзавай Ц1имп1ит1аназ кьулухъай атана уьгъриди худ гана вац1уз вегьена, вичин кар давамарна хъфена.
Са т1имил яргъалай кьере итимриз Ц1имп1ит1ан акуна цяй ахкъудна вич вичел хкана
- Я Ц1имп1ит1ан, вахъ вуч хьана? Вуна чуьхуьнагар ийизвайни?
- Ваъ, за вац1уз лагьана, яд маса патахъ элкъуьр авурай, ахпа вац1у заз минетна, за вичиз къалур авун патал, ахпа сада худ гана зун циз вегьена.
- Гьа-гьа-гьа, гьак1 хьайиди ян кар? Вац1 вахъ галаз раханан? Белки ам лезги ч1ал чидай гъед тирт1а, ваз жувабар гайиди?
Ци тади гана ваз, чан хва. Ахлад вун к1вализ.
Ик1 вирида хъуьруьнарна, Ц1имп1ит1анал, анлай кьулухъни адан гафаризни мад яб хганач. Хуьре авахьзавай михьи яд авай вац1у вичин жемятдиз и жуьре куьмекна.