Дагъдин кук1вал виликра
Еке са лекьре авуна муг
Акъвазна к1аник килигна
Луваривди акъудна руг
Лекьре лувар ахъайна
Вичин чилел элкъведай
Булах чиляй акъатна
Инсанди к1вал эцигдай
Жемят авай к1ане-к1уне
Дагъдиз гудай авачир чан
Абурун чкадал вучдай куьне?
Алай кьилел залум са хан
Гьикьван эхда азият?
Узгъундикай авач мумкин
Им мус тух хьун лазим я?
Къакъудзавай дана калин.
Чубан хьана лекьрез минет
Къалурна хьи халкьдин суьрет
-Зи рик1ин т1ал язва зи халкь
Бахтлу я зи хпер ахмакь
Кеф абуруз аквазвай дагъ
Къайи булах, михьи гьава
Кьилел алач я хан я шагь,
Тек ви лувар ава цава
На ихтияр це ман, чан лекь
Чун ви дагъдиз хкаж жен
Бес хьурай чаз кашни мекь
Шад жеда, хьайит1а гъен"
-Дагъдиз к1ан туш темпелар
Пуд сефер гзаф жеда четин
Пара герек я зегьметар
К1вал-югъ хьун патал къалин"
-Хьурай, чан лекь, рази я
Зегьметдивни вердиш я
Цада цанар, ийида чуьлер
Кутада чна мални-девлет.
Аван булах са тик синел
Дуьзенлай рехъ аквадайвал?
Кутада хуьр дагъдин гине
Гьанлай душман хкадардайвал
-Булахрикай жеда к1амар
К1амарикай хьанва вац1ар
Абад жедай куь халкьар
кьисметда ават1а дагълар
Душман атайт1а гадра яргъал
Пис душман я къене патан.
Ша къалурда яд алай чка"
Къармахраваз гъвеч1и чубан
Лекь халуди тухвана цавуз
Куьтягьначир гафар лугьуз
-Килиг, чубан, гьич садрани
Халкьдин т1вар мийир ажуз
Дагъди хуьда адет - айиб
Квез, инсанриз, куьмек я им
Какадармир на куь иви
Намус сифте я гьа, килиг!
Зегьметдикай хкуда лезет
Куьзуьбур хуьх аяларни
Эцигай квел абуру къимет
Михьивал хуьх дагъларани!"
Ц1ийи михьи булахдал
Лекьре ахъайна къармахар
Чубандини экъуьрна вил
Дагълариз багъишна рик1
Гана лекьре несигьатар
Дуьзендиз ам рахкурна
Са вахт хьанач - ич1и сятар
Хтана, халкь аваз гуьгъуьна...