Վերջին շրջանում Բաքվի և Թեհրանի հարաբերությունները սրվել են։ Իրանցի պաշտոնյաները բազմիցս հայտարարել են Իրանի սահմանների մոտ իսրայելական ներկայության՝ Թեհրանի համար անընդունելի լինելու մասին։ Հոկտեմբերի 1-ին Իրանը խոշոր զորավարժություններ է սկսել երկրի հյուսիս-արևմուտքում։ Armenia Today-ը քաղաքագետ Հրանտ Միքայելյանի հետ զրույցում անդրադարձել է լարվածությանը, դրանից բխող հնարավոր հետևանքներին։ Հարաբերությունների սրման ֆոնին, ամեն դեպքում, Հրանտ Միքայելյանը կարծում է, որ այս փուլում ռազմական հակամարտության հնարավորություն չկա։ «Իրականում այդ լարվածության ֆոնը վաղուց կար։ Պարզապես հիմա, երբ Ադրբեջանն Արցախի օկուպացված տարածքներում շարունակում է բնակեցումը, այդ թվում՝ ոչ տեղի ժողովուրդների կողմից, ու նաև շարունակում է տարածաշրջանի միլիտարիզացիան, Թեհրանում կան մտավախություններ, որ այդ ամենը կարող է օգտագործվել Իրանի դեմ։ Դրան նպաստում է նաև այն հանգամանքը, ըստ որի՝ պատերազմի ժամանակ պարզվեց, որ հյուսիսային Իրանում կան ադրբեջանական հետախուզական խմբեր։ Իրանում, մեծ հաշվով, մտավախություններ կան իրենց երկրի տարածքային ամբողջականության առումով։ Այլ մտավախություններ ևս կան։ Ընդհանուր առմամբ, հարաբերությունները սրվել են, բայց այս ամենը դեռ հեռու է պատերազմի վերածվելու հնարավորությունից, որովհետև պատերազմի համար շատ ավելի լուրջ պայմաններ պետք է լինեն, որոնք դեռ չկան։ Բացի այդ, պետք է լինի նախապատրաստական փուլ, ինչպես նաև որոշակի գործողություններ, որոնք դեռ չենք տեսնում»,- ասաց Հրանտ Միքայելյանը։ Հարաբերությունների սրման ֆոնին անդրադառնալով ՀՀ ԱԳ նախարար Արարատ Միրզոյանի՝ Իրան այցի նպատակներին ու արդյունքներին՝ նա նշեց․ «Ես չեմ կարող մեկնաբանել, որովհետև բավարար տեղեկատվության չեմ տիրապետում, բայց կարող եմ ասել, որ այդ դիալոգը պետք է շարունակել ու խորացնել»։ Հարցին՝ հնարավո՞ր է այս փուլում որևէ ձևով Իրանի զորքերի տեղակայում լինի Սյունիքում, քաղաքագետը պատասխանեց․
«Ոչ, դրանից դեռ շատ հեռու ենք, որովհետև Իրանի և Հայաստանի միջև որևէ նման նորմատիվային բազա չկա։ Չկա նաև ընդհանուր խնդիրների հասկացություն ասվածը։ Դրա առկայության դեպքում միգուցե կարելի է քննարկել վերոնշյալը»։ Քաղաքագետն ArmeniaToday-ի հետ զրույցում անդրադարձել է նաև տարածաշրջանում լարվածության վերջին փուլի պատճառներին։ Դիտարկմանը՝ կարելի է ասել, որ այն կապված է Թուրքիայի և Ադրբեջանի կողմից տարածաշրջանում իրենց դիրքերն ուժեղացնելու փորձի հետ՝ ի վնաս Իրանի ազդեցության, նա պատասխանել է․ «Ես մի քիչ ավելի լայն դիտարկում կանեի։ Ընդհանուր առմամբ, համավարակի ու տարբեր այլ իրադարձությունների ֆոնին տարածաշրջանում շատ անկայուն իրավիճակ է ստեղծվել, քան մինչ այս եղել է։ Բացի այդ, ԱՄՆ-ի ու ՌԴ-ի ազդեցության փոփոխություն կա, Չինաստանի գործոնն է աճում, իսկ տարածաշրջանի ներսում վերադասավորումներ կան։ Դրանից ելնելով՝ այն ուժերը, որոնք կուտակել են լրացուցիչ ռազմական և այլ պաշարներ ու հնարավորություններ, հիմա փորձում են դրանից օգտվել։ Դրանք են Թուրքիան ու Ադրբեջանը, իսկ Իրանն այս առումով ուշացել է և հիմա բախվում է նոր իրողութան հետ։ Իրանը փորձում է իր տեղը գտնել, թե ինչպիսին կլինի նոր տեղը, դեռ կտեսնենք, բայց պետք է հաշվի առնենք, որ անկայունությունն այս տարածաշրջանում ավելի շատ սկսում, քան ավարտվում է»:
#քաղաքագետ #Իրան #Ադրբեջան
Լրացուցիչ տեղեկությունների համար այցելեք կայք
Հայաստանի նորությունները Telegram-ում