COVID-19 համաճարակը զգալի ազդեցություն է թողել մեր կյանքի վրա: Մեզանից շատերը կանգնած են մարտահրավերների առջեւ, որոնք կարող են սթրեսային լինել, ճնշող եւ անցանկալի հույզեր առաջացնել: Հասարակական առողջապահական գործողությունները, ինչպիսիք են սոցիալական հեռավորությունը, անհրաժեշտ են COVID19-ի տարածումը նվազեցնելու համար, սակայն դրանք կարող են մեզ ստիպել զգալ մեկուսացված եւ միայնակ։ Սա կարող է բարձրացնել սթրեսն ու անհանգստությունը: Սթրեսը առողջ կերպով հաղթահարել սովորելը կդարձնի ձեզ եւ այն մարդկանց, ում մասին հոգ եք տանում, ավելի դիմացկուն:
Սթրեսը կարող է առաջացնել՝
- Վախի, զայրույթի, տխրության, անհանգստության կամ հիասթափության զգացում,
- Ախորժակի, էներգիայի, ցանկությունների եւ հետաքրքրությունների փոփոխություններ,
- Կենտրոնանալու եւ որոշումներ կայացնելու դժվարություն,
- Քնի խանգարում կամ մղձավանջներ,
- Ֆիզիկական ախտանիշներ, ինչպիսիք են գլխացավերը, մարմնի ցավերը, ստամոքսի խնդիրները եւ մաշկի ցանը,
- Խրոնիկ առողջական խնդիրների վատթարացում,
- Հոգեկան առողջության վիճակի վատթարացում,
- Ծխախոտի, ալկոհոլի եւ այլ նյութերի օգտագործման ավելացում։
COVID-19 համաճարակի ժամանակ սթրես եւ անհանգստություն զգալը բնական է: Ստորեւ բերված են եղանակներ, որոնք կարող են օգնել ձեզ եւ ձեր համայնքին հաղթահարել սթրեսը:
Սթրեսը հաղթահարելու առողջ ուղիներ՝
Սահմանափակեք նորություններ դիտելը, կարդալը կամ լսելը, այդ թվում ՝ սոցիալական ցանցերում․ տեղեկացված լինելը լավ է, բայց համաճարակի մասին անընդհատ լսելը կարող է նյարդայնացնել: Ծանոթացեք նորություններին օրական մի քանի անգամ եւ որոշ ժամանակով անջատեք հեռախոսը, հեռուստատեսությունը եւ համակարգչի էկրանը:
Ժամանակ հատկացրեք լիցքաթափվելու համար․ փորձեք զբաղվել ձեզ հաճելի այլ զբաղմունքներով։
Շփվեք ուրիշների հետ․ խոսեք այն մարդկանց հետ, ում վստահում եք ձեր մտահոգություններն ու զգացմունքները։
Կապ պահեք ձեր համայնքի հետ․ փորձեք կապ հաստատել առցանց, սոցիալական ցանցերի միջոցով կամ հեռախոսով։
Օգնեք ուրիշներին հաղթահարել սթրեսը՝
Ինքներդ ձեզ խնամելը կարող է նախապատրաստել ձեզ ուրիշների մասին հոգալու համար: Սոցիալական մեկուսացման ժամանակ հատկապես կարեւոր է կապ պահպանել ձեր ընկերների եւ ընտանիքի հետ: Հեռախոսազանգերի կամ տեսազրույցների միջոցով կապ հաստատելը կօգնի ձեզ եւ ձեր սիրելիներին զգալ ավելի քիչ միայնակ կամ մեկուսացված: