ՀՀ վարչապետ Նիկոլ Փաշինյանը 2022 թվականի պետական բյուջեի նախագծի վերաբերյալ այսօրվա կառավարության նիստում ուղերձ հղեց։ «2021թ․ հաղթահարվեց ներքաղաքական ճգնաժամը և բավականին ամուր հիմքեր ստեղծվեցին համախմբան ու դեպի ապագա հայ ժողովրդի ձգտման համար։ Մեր նպատակադրումները, որոնք առկա են ՀՀ բյուջեում ու գործունեության ծրագրում, հավակնոտ են և իրատեսական»,- ասաց նա՝ ընդգծելով մի շարք առաջնահերթ ուղղությունների մասին։ «Մյուս խնդիրը վերլուծական կարողությունների բարձրացումն է, ինչը թույլ կտա բարձրացնել ներդրումների արդյունավետությունը, սոցիալական ծրագրերի հասցեականությունը, որը կարևորագույն խնդիրներից է։ Արդյունքում՝ կբարձրանա նաև հասարակության վստահությունը առ այն, որ իրենց հարկերը ծախսվում են առավել արդյունավետ ու թիրախային։ 2022-ի բյուջեն հենվում է երեք առաջնահերթ ուղղությունների վրա։ Առաջին՝ անվտանգության համակարգի բարեփոխում, երկրորդ՝ ենթակառուցվածքների զարգացում, երրորդ՝ կթության և գիտության արդիականացում։ Մեծ ուշադրություն ենք դարձնելու անվտանգության ապահովմանը, առանց որի հնարավոր չի լինի երկարաձգել երկարաժամկետ զարգացման նպատակները։ Այս իմաստով կարևոր է ոչ միայն բանակի պաշտպանական կարողությունների արդիականացումը, այլև ՀՀ-ի շուրջ բարենպաստ արտաքին միջավայրի ձևավորումը, ՀՀ-ի, Արցախի և տարածաշրջանի համար խաղաղ դարաշրջան բացելու օրակարգի հետևողական իրագործումը։ Այս իմաստով կարևոր է տարածաշրջանում տրանսպորտային կապերի և ենթակառուցվածքների բացումը ու զարգացումը, որը կարող է որակապես փոխել ՀՀ տնտեսության որակը, ապահովել նաև երկարաժամկետ տնտեսական աճ, էականորեն բարձրացնել մեր երկրի գրավչությունն օտարերկրյա ներդրումների համար»,- ասաց Փաշինյանը։ Նրա խոսքով՝ կառավարության ծրագիրը հաջող իրագործում է ունենալու ու ապահովելու է ՀՀ քաղաքացիների անվտանգությունը, բարեկեցությունը և արժանապատիվ կյանքը։
Լրացուցիչ տեղեկությունների համար այցելեք կայք