Хьана хьанач кьван са хуьре са паб. Идаз авай са демек, ана касни хуьзвачир.
Эхир папа вичиз верчер кутаз к1ан хьанвайдакай, маса хуьруьнви папариз булахдал хабар гана.
- Ят1а за ваз муштулухдай са фере к1ек гуда - лагьана сифте папа.
- За ваз са хъсан бадбад гуда - лагьана кьвед лагьай папа.
- Ят1а чан зани ваз са верч гуда, амма зибур гьеле ц1иц1ибар я. Са т1имил еке хьайила гъида за ам ви к1валихъ.
Гьанлай кьулухъ уьрдегни к1ек санал демекда яшамиш жез эгеч1на.
Гьар экуьнахъ к1екрез папа къуьл гузвай, уьрдегдиз мух вегьизвай.
Са юкъуз к1екрез ида къуьл вегьена, мух рик1елай фена. Гьавиляй бадбадди тади кваз хтана к1екрен ем т1уьна.
Вуу, гзаф хъел атана экуьн кьиляй гишин к1екрез.
- Къазвал хьтин хъартас, ви къен къазуй, къалмаз! Къабарламиш хьуй вун, къабачи!
- Яраб жал сик1 атана? - кич1е хьана папаз к1екрен къакъайрин мусибат акурла.
Демекдин патав атана килиг авурт1а, акуна, вичин рик1елай уьрдегдиз т1уьн гуз рик1елай фенвайди. Гъана мух вегьена, гишин к1екрени зверна, хвешила.
- Вач анихъ, суфат туш са къван я вуууууу. Вичин т1уьн т1уьна гила мухунал вегьена сада - лагьана папа чукурна к1ек.
Уьрдегдини фад-фад мухни т1уьна, разидаказ ацукьна.
Гишин к1екрез мад къуват амачир, гьавиляй ада аватай зат1-мад жагъидат1а лугьуз къекъвезвай.
Гила угъраш уьрдегдиз амал чир хьана. Гьар экуьнахъ къвез сифте к1екрехъ галаз къуьл незвай, ахпани вичин мух.
Вичин гьяркьуь еке к1уф кутуна к1екрелай кьве сеферда фад незвай.
Вични хъсан як1уз атана, ц1акулрини нур гуз, кьведан т1уьн нез, уьрдег хушбахт хьанвай.
Пуд лагьай папани хкана фере-верч,гила ибур демекда пуд хьана. Уьрдегдини гьа авай жуьре виридалайни гзаф незвай, куьк хьанвай.
Ахпа са юкъуз ихьтин кар хьана.
Демекдихъ элкъвена симерин чил галай, ничхирар гьавадал хьун патал.
Са нянихъди симин чил чилив хкьазвай чкадлай сик1ре чил эгъуьнна, демекдиз гьахьна. Хурушум вахтунда к1екериз верчериз экв аквадач, ам сик1 тирди ибуруз сесерилай чир хьана.
Аткана ина са гьарай-эвер!
- Къарагъ, къарагъ, я иеси паб! Къутармиш ая чун и къачааагъ къандахдикай! Къав чк1ана к1валин къалабулух ава! Къирмиш хьайи къагьбее сик1!!!
Мад къакъра яз к1ек катзвай инихъай анихъ, вич сик1ре кьун тавун патал. И къарма-къатиш тунвай сик1 ман дилиди туш кьван, ам сифте килигна гьидал як гзаф алат1а, ахпа кьуна уьрдег тухвана вичи симин к1аникай авунвай гелез, акъатна гьараяр уьрдегдай.
Яхун сик1 фена т1еквендай, куьк уьрдег ак1ана симина.
Эхир атана акъатна иеси паб гьарайрин ванерикай хабар хьайи, къачуна са пая вегьена ида сик1рез, сивевай уьрдегни ахъайна, катна тумуна лаш кьур сик1.
Сик1 катдайла аткана папан к1вачера, папавай вичин беден хуьз тахьана, аватна чилел. К1екре амайдалани гзаф къакъра яна.
Сик1рен гелни квахьна. Паб са гужуналди къарагъна, уьрдегдиз килигна. Адал чан аламай, анжах к1вачер ханвай, гьавиляй уьрдегдикай шурпа хъувуна.
- Кьей сик1ре куьн гила санал тадач, гьавиляй демек хъсан мягькемар авуна к1анда.
Гьанлай кьулухъ к1екни верч яшамиш хьана гьана, чпиз ц1иц1ибарни акъудна. Чеб ана амаз, зун иниз хтана.
