Канцэртная праграма “У адзінстве народа – адзінства краіны” была прадстаўлена ў Смаргонскім раённым Цэнтры культуры 17 верасня.
Перад пачаткам канцэрта ў фае ладзілася выстава “Гісторыя майго краю”, святочны настрой гледачам ствараў народны струнны ансамбль “Кантрасты”.
З прывітальным словам да прысутных звярнуўся старшыня раённага Савета дэпутатаў Сяргей Кудзеньчука. “Нашаму пакаленню ёсць што перадаць моладзі, - зазначыў Сяргей Мікалевіч. - Нашу квітнеючую, моцную і незалежную Радзіму, у якой нашы дзеці і ўнукі будуць захавальнікамі і носьбітамі культуры нашай нацыі. Давайце разам будзем рабіць нашу дзяржаву яшчэ лепшай, багацейшай, мацнейшай”.
На пярэдадні свята арганізатары канцэрта звярнуліся да жыхароў Смаргоншчыны з пытаннем: “Што для вас азначае паняцце – адзінства?”. Вядучыя прапанавалі паслухаць адказы землякоў. На іх аснове можна вывесці формулу адзінства. І не адну. Што і зрабілі падчас святочнай імпрэзы.
“Адзінства народа – у культурнай спадчыне. Яна моцна звязвае беларусаў у адно цэлае, незалежна ад сацыяльнага становішча, поглядаў, колеру вачэй. Пазбаўляе ад адзіноты, даючы магчымасць выказаць свае думкі і пажаданні”.
“Адзінства народа – у працы. Справы слынных землякоў паказваюць, як трэба працаваць на карысць Радзімы”.
“Адзінства краіны – у ініцыятыўнай, энергічнай, таленавітай, сацыяльна-адкрытай моладзі”.
“Адзінства краіны - у шчаслівым дзяцінстве. Найважнейшыя каштоўнасці – сямейныя. Мары дзяцей. Сувязь з бацькамі. Таленавітыя дзеці – аснова і будучыня дзяржавы”.
“У адзінстве народа – сіла народа. Магутным фактарам дзяржаўнасці з’яўляецца наша невымоўная сіла духу, згуртаванасць, салідарнасць і паразуменне, веданне традыцый, мовы і гісторыі сваёй краіны, павага да старэйшага пакалення, кожнага члена сям’і”.
На сцэнічную пляцоўку раённага Цэнтра культуры выйшлі лепшыя творчыя калектывы і артысты. Спевакі, танцоры, музыкі. Зусім юныя і з вялікім вопытам. Музыка мае цудадзейную сілу аб’ядноўваць людзей, натхняе і дорыць неймаверныя эмоцыі.