Ta’lim tizimida olib borilayotgan islohotlar natijasida bugun yurtimizdagi oliy ta’lim muassasalari soni 144 taga yetdi. Bitiruvchilarni oliy ta’lim bilan qamrab olish ko‘rsatkichi 9 foizdan 28 foizga o‘sdi.
Kuni kecha Kattaqo‘rg‘on shahrida ilk oliy o‘quv yurti - Samarqand davlat universiteti Kattaqo‘rg‘on filialida yangi o‘quv yilining tantanali ochilish marosimi bo‘lib o‘tdi.
Tadbirni Samarqand davlat universiteti rektori, professor, Oliy Majlis Senati a’zosi Rustam Xolmurodov kirish so‘zi bilan ochib, barcha talabalarni yangi o‘quv yili boshlanganligi bilan tabrikladi. Samarqand davlat universitetining ushbu filiali Kattaqo‘rg‘on zaminida yangi yosh avlodga sifatli ta’lim beruvchi, mamlakatimiz rivoji uchun yetuk kadrlar yetkazuvchi maskan ekanligini alohida ta’kidladi.
Samarqand viloyati hokimi Erkinjon Turdimov Prezidentimizning ta’lim sohasiga berayotgan yuksak e’tibori natijasida faoliyatini boshlagan ushbu filial Samarqand ilmiy muhitida o‘z o‘rnini topishiga ishonch bildirdi.
Kattaqo‘rg‘on shahar, Ishtixon tumani va Narpay tumani hokimlari, Majidiy teatri aktyor va aktrisalari, O‘zbekistonda xizmat ko‘rsatgan artist Davron Qodirov, "Do‘stlik" ordeni sohibi Gulbahor Mamedova, Dilorom Egamova, "Shuhrat" medali sohibi Gulnora Rizayeva bilan "Yangi O‘zbekistonda erkin va farovon yashaylik" shiori ostida mustaqillik darslari tashkil qilindi.
Ma’lumot uchun, Samarqand davlat universitetining Kattaqo‘rg‘on filialida 11 kunduzgi ta’lim yo‘nalishi mavjud bo‘lib, ushbu o‘quv yilida 600 nafar talaba 1-bosqichga qabul qilingan.
Shuningdek, filialning ta’lim-tarbiya jarayonlarini zamon talablariga mos tarzda tashkil etish uchun ajratilgan 950 o‘rinli o‘quv binosi va 200 o‘ringa mo‘ljallangan talabalar turar joyini joriy ta’mirlash, mebel, zamonaviy kompyuter texnikasi, o‘quv adabiyotlari va boshqa moddiy-texnik vositalar bilan to‘liq jihozlar ishlariga 7.5 millird so‘m mablag‘ ajratilgan.
Samarqand davlat universiteti
Axborot xizmati