Нәпақасынан айрылғандар жұмысты әдетте өз бетінше интернеттен іздей бастайды. Тиісті мамандық бойынша түрлі нұсқаларды қарастырып, түйіндемені жіберіп, сұхбаттасуға барады. Кейбіреулер «таныс» арқылы да жұмысқа орналасады. Дегенмен, жұмыспен қамту орталығы арқылы да жұмысқа орналасуға болатынын біреу білсе, біреу біле бермейді. Халықты жұмыспен қамтуда қандай шаралар қарастырылған? Қандай мемлекеттік бағдарлама арқылы жұмыстар ұсынылған? Бұл жөнінде Vox Populi тілшісі Алматы облысы Іле ауданы әкімдігіне қарасты халықты жұмыспен қамту орталығы директорының орынбасары Ұлбосын Бердібековамен сұхбаттасқан еді.
VOX: Халықты жұмыспен қамту қандай бағдарлама арқылы жүзеге асырылады?
— Халықты жұмыспен қамту нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы арқылы жүзеге асырылады. Мемлекеттік бағдарламаның мақсаты — халықтың өнімді жұмыспен қамтылуына жәрдемдесу және азаматтарды кәсіпкерлікке тарту. Аталған бағдарлама негізінен үш бағыт бойынша іске асырылуда.
Біріншісі, қысқа мерзімді кәсіби курстар. Бұл ретте жұмыс іздеп келгендерді қалауы бойынша үш айлық курстарға оқуға жібереміз. Оларға 20 949 теңге көлемінде стипендия, жол ақысы төленеді. Үміткерлердің тігінші, кондитер, шаштараз, маникюр, аспазшы, электргаздәнекерлеуші, бояушы мамандықтарын игеру мүмкіндігі бар. Биыл Іле ауданы бойынша 205 адам жіберілген болатын. Олардың 122 курсты аяқтаса, 65-і жұмысқа орналастырылды.
— Екіншісі, жаппай кәсіпкерлікті дамыту мақсатында несиелер мен гранттар беру. Келген адамдардың құжаттары тексеріліп, кәсіпкерлік палатасына бір айға онлайн тәртібінде оқуға жіберіледі. Олар да стипендия төлейді. Оқу аяқталған соң «Бастау бизнестің» сертификатын алады. Содан кейін жұмыс іздеуші «Ауыл шаруашылығын қаржылай қолдау» қаржылық компаниясына барып, ауыл шаруашылығында кәсібін ашу үшін алты пайыздық мөлшерлемемен несие ала алады. Сонымен қатар халыққа қызмет көрсету саласында кәсіп ашса болады. Сосын біз грант береміз. Биыл, жыл басынан бастап біз 200 АЕК-ке сәйкес 90 адамға берілді. Грант алу арқылы шаштараз ашу, тігін цехын ашу тәрізді шағын кәсіпті дамытуға болады. Грант алып, оқытудың арқасында жаңа жұмыс орындары ашылды. Үйде отырған аналар жұмыспен қамтылды. Мүгедектер, көп балалы адамдар үйлерінде отырып, тігін тігіп, аспаздықпен шұғылданып деген сияқты, отбасын жұмыспен қамтып отыр. Бұл дегеніміз берілген грант өзінің тиімділігін көрсетіп отыр деген сөз.
Толығырақ осы жерден оқыңыздар