Հուլիսի 29-ին ԵԱՀԿ համանախագաները հանդես եկան հայտարարությամբ, որի հիմնական ուղերձը հայ-ադրբեջանական սահմանի երկայնքով լարվածության թուլացմանն ուղղված քայլերի ձեռնարկումն էր, սադրիչ քայլերից և հայտարարություններից զերծ մնալու Ադրբեջանին և Հայաստանին ուղղված կոչը, ինչպես նաև հակամարտության համընդգրկուն և տևական կարգավորման շուրջ ԵԱՀԿ Մինսկի խմբի հովանու ներքո բանակցային գործընթացը վերսկսելը։ Այս մասին կառավարոության այսօրվա՝ օգոստոսի 12-ի նիստի ժամանակ իր բացման ելույթում ասաց ՀՀ վարչապետ Նիկոլ Փաշինյանը։ Փաշինյանը հիշեցրեց, որ ՀՀ ԱԳՆ-ն հուլիսի 30-ին հանդես եկավ հայտարարությամբ, որով ողջունում էր համանախագահների հայտարարությունը։ Նա նշեց, որ լիովին կիսում է համանախագահների հայտարարության տրամաբանությունը և կարծում է, որ անհրաժեշտություն կա նույնականացնելու սադրանքների գնացող, հրադադարի ռեժիմը խախտող կողմին և սահմանել պատժիչ գործողություններ։ Առանց միջազգային մոնիթորինգի գործարկման՝ այս ամենը պատկերացնել հնարավոր չէ։ Վարչապետը շեշտեց, որ միջազգային դիտորդական խմբերի ներգրավումն անհրաժեշտություն է։ Ու եթե ՀԱՊԿ դիտորդական խմբի համար դա ընդունելի չէ, ապա դիտորդական առաքելություն պետք է անցկացնի ԵԱՀԿ-ն։ «Հայ-ադրբեջանական սահմանի դեմարկացիայի և դելիմիտացիայի մասին մեր դիրքորոշումն անփոփոխ է։ Թշնամանքի խորացումը մեր տարածաշրջանում անթույլատրելի է։ Դա սպառնալիք է ոչ միայն տարածաշրջանի, այլև միջազգային անվտանգության համար»,- ասաց նա՝ նշելով, որ ԶՈւ-ն զարգացնելու և վերափոխելու Հայաստանի մտադրությունը ոչ թե ագրեսիա ստեղծելու, այլ հնարավոր ագրեսիայից պաշտպանվելու համար է։ Մենք տարածքներ նվաճելու նպատակներ չունենք։ Պատրաստ ենք ակտիվ երկխոսություն սկսել օրակարգի շուրջ միջազգային գործընկերների աջակցությամբ՝ ըստ անհրաժեշտության նաև ուղիղ շփումների միջոցով։ Փաշինյանը շեշտեց, որ այս ամենը կքննարկվի կառավարության գործունեության 5-ամյա ծրագրի քննարկման ժամանակ։