Նախորդ գումարման Ազգային ժողովի իշխող «Իմ քայլը» խմբակցության պատգամավոր Հովհաննես Հովհաննիսյանը Երևանի պետական համալսարանի ռեկտորի նոր ժամանակավոր պաշտոնակատարն է։ Բուհն ավելի քան երկու տարի ռեկտոր չունի։ ԵՊՀ դոցենտ, պատմական գիտությունների թեկնածու Մենուա Սողոմոնյանն Armenia Тoday-ի հետ զրույցում նշել է, որ մասնավորապես ԵՊՀ-ի հարցում գործող իշխանություններն այն հպատակեցնելու, բուհը քաղաքական գործիք դարձնելու, բուհի վրա մենաշնորհային վերահսկողություն սահմանելու քաղաքականություն են վարում։ Նա հիշեցրեց, որ իշխանութունները նախ հասան արդեն ռեկտոր Արամ Սիմոնյանի հրաժարականին, ու քանի դեռ բուհում ռեկտոր չկար՝ ԵՊՀ-ում տուրբուլենտ վիճակներ էին։ «Իշխանություն գալուց ի վեր ԵՊՀ-ի վրա սկսվեց շատ մեծ ճնշում կիրառվել։ Իշխանությունները հասան նրան, որ մեկ տարի հետո բուհի նախկին ռեկտորը հրաժարական ներկայացրեց ու կրկին, իշխանության լծակների գործադրմամբ, այդ ժամանակ ռեկտորի պաշտոնակատար նշանակեցին Գեղամ Գևորգյանին, թեև արդարության համար պետք է նշեմ, որ Գեղամ Գևորգյանը համալսարանական զգալի շրջանակներում ընդունված անձնավորություն էր»,- ասաց նա։ Մենուա Սողոմոնյանը շեշտեց՝ ի վերջո, տեղի տալով որոշ ճնշումների, 2020-ի փետրվարին ԵՊՀ ռեկտորի ընտրություններ հայտարարվեցին, որոնք, ըստ նրա, ապօրինի կերպով չեղարկվեցին։ Այնուհետև, նրա խոսքով, արդեն տեսանելի էր, որ ԵՊՀ հոգաբարձուների խորհրդի կազմում ընդգրկել էին մարդկանց՝ հաշվի առնելով զուտ քաղաքական լոյալությունը։ ԵՊՀ դոցենտը շեշտեց, որ նրանց, ամեն դեպքում, չստացվեց հասնել իրենց ցանկալի թեկնածուի ընտրությանը ու արդյունքում՝ հոգաբաբարձուների խորհրդի 15 անդամներն ուղղորդված դիմում գրեցին։ Հետո, մեր զրուցակցի խոսքով, սկսվեց ապօրինությունների մյուս շարքը։ Խոսքը Բարձրագույն կրթության և գիտության մասին օրենքում ներառված այն դրույթի մասին է, ըստ որի՝ բոլոր բուհերի կառավարման խորհուրդները պետք է բաղկացած լինեն 9 հոգուց, որոնցից հինգին միանձնյա նշանակելու է նախարարը։ Հիշեցնենք, որ բոլորովին վերջերս դրույթը հակասահմանադրական է ճանաչվել։ «Այնուհետև երկրորդ քայլն արեցին։ Կառավարությունը, որպես հիմնադիր, միանձնյա կերպով փոփոխություններ կատարեց ԵՊՀ կանոնադրության մեջ, ինչի իրավունքը չունի։ Միանձնյա ձևով ԵՊՀ կանոնադրության մեջ փոփոխություն կատարելը բուհական ինքնաբավության տեսանկյունից կոպտագույն խախտում է, որովհետև բուհի ներքին համայնքից ոչ ոք չի մասնակցել ԵՊՀ կանոնադրության մեջ կատարված այդ գործընթացին։ Ըստ այդ փոփոխության՝ ռեկտորի պաշտոնի համար պրոֆեսորի գիտական կոչման պահանջը պետք է հանվի, որ կարողանան իրենց ուզած թեկնածուին նշանակել»,- ասաց նա՝ հիշեցնելով, որ ԵՊՀ ռեկտորի նոր ժամանակավոր պաշտոնակատարը՝ Հովհաննես Հովհաննիսյանը, պրոֆեսորի կոչում չունի։ Մենուա Սողոմոնյանը նշեց, որ երրորդ փոփոխությունը երեք հոգանոց ժամանակավոր խորհուրդ ձևավորելու մասին է, որն իրականացվել է՝ հիմք ընդունելով Հիմնադրամների մասին օրենքը։ Միևնույն ժամանակ նա շետշեց՝ ԵՊՀ-ում չի կարելի նման մոտեցում ցուցաբերել՝ հիշեցնելով, որ այս հանգամանքը ՄԻՊ-ի կողմից վիճարկվում է Սահմանադրական դատարանում։ Խիստ գաղտնի, ոչ հրապարակային պայմաններում որոշումներ կայացնելու հանգամանքը մատնանշելով՝ նա շեշտեց, որ ԵՊՀ ռեկտորի նոր ժամանակավոր պաշտոնակատարի անունը իմացել են միայն նախարար Վահրամ Դումանյանի կողմից նրան ներկայացնելու ժամանակ։ Մենուա Սողոմոնյանը ժամանակավոր պաշտոնակատարին նշանակելու գործընթացը հակասահմանադրական է համարում։ «Իշխանության համար օրենքներն ու սկզբունքները ֆիկցիա են։ Նրանց համար գոյություն ունի մի սկզբունք՝ ամեն գնով պահել իշխանությունը։ Նոյեմբերի 9-ից հետո ԵՊՀ-ն առաջինն էր բուհերի մեջ, որը դիրքորոշում հայտնեց՝ նշելով, որ վարչապետը պետք է հաժարական տա։ Նման գործընթացներից ապահովագրվելու համար ապօրինի միջոցառումներ են իրականացնում։ Հիմա նշանակել են իրենց ենթարկվող, հպատակվող մարդու, որպեսզի բուհում լիարժեք վերահսկողություն սահմանեն և ապահովագրվեն բողոքի գործողություններից ու շարժումներից»,- ասաց նա՝ շեշտելով, որ նման գործելաոճ է դրսևորվում բոլոր բուհերի նկատմամբ։ Մենուա Սողոմոնյանը իրավիճակից դուրս գալու մի ուղի է տեսնում։ ԵՊՀ դոցենտը կարծում է, որ Բարձրագույն և հետբուհական կրթության մասին գործող օրենքի սահմանած կարգով նախ պետք է ԵՊՀ հոգաբարձուների խորհրդի համալրում, վերահամալրում տեղի ունենա և արագ հայտարարվեն ռեկտորի մրցակցային ընտրություններ։
Լրացուցիչ տեղեկությունների համար այցելեք կայք
Հայաստանի նորությունները Telegram-ում