Танымал желілік компанияда жұмыс жасайтын бір танысым биологиялық белсенді қоспаның адам ағзасына қаншалықты пайдалы екенін ауызының суы құрып әңгімеледі. Тіпті соның арқасында анасының бірқатар сырқаттардан арылғанын айтты. «Голландиялық шоколад, орман жемістері, тропикалық жемістер» қосылған түрлі қоспалар ер адамдар мен әйелдердің ағзасына сәйкестендіріліп дайындалған, күш-қуат пен қайрат беріп, буындардың дұрыс жұмыс жасауына, мидың қызметіне жақсы ықпал ететінін алға тартты. Биоқоспалардың бір құтысының бағасы 8 000-нан 40 000-ға дейін барады. Шынымен де, осы биологиялық қоспалар деген не? Оның адам ағзасына қаншалықты пайдасы бар? Әлде зияны да бола ма? Біз дәл осы сауалдарды «Қазақ тағамтану академиясы» тағам қауіпсіздігі мен сапасын бақылау зертханасының жетекшісі Ирина Краснова ханымға қойған едік.
VOX: Биологиялық белсенді қоспалар деген не?
— Биологиялық белсенді қоспалар дегеніміз — тағам құнарын арттыру мақсатында қолданылатын табиғи және табиғи тектес заттар. Оны тағаммен қатар тұтынуға болмаса да, тағам құрамына қосып пайдалануға болады. Бүкіл әлемде ол тағамдық өнім қатарына жатқызылады. Оған қарамастан оның нақты бір бағыты бар. Мысалы, «В» дәрумерінің, «Д» дәруменінің көзі деген сияқты, затбелгісінде оны қолдану аясы бар. Демек ол біздің тағам рационымызды жетіспейтін компоненттермен толықтырады. Биологиялық белсенді қоспалар ағзаны тағамдық талшықтар, дәрумендер, минералдармен байыту үшін қолданылады.
VOX: Бүгінде биоқоспалар жиі талқыға салынып жүр. Биологиялық белсенді қоспа адам ағзасына пайдалы ма?
— Биологиялық белсенді қоспа тағамдық өнім санатынан болғандықтан, оны дәрігердің нұсқауынсыз пайдалануға болады. Биоқоспаны затбелгісінде қабылдауға қарсы көрсетімдер жоқ болса, өз бетінше тұтынуға болады. Бірақ, қазіргі нарықта, әсіресе желілік компания өкілдері биоқоспалар көп ауруларды емдейді деп айтады. Биоқоспалар ешқандай ауруды емдемейді! Оның сыртқы пішіні дәріге ұқсас болғанымен, ол — дәрілік зат емес. Дегенмен, биоқоспаларды заманауи медицинаның болашағы бар саласы дегім келеді. Семіздік, жүректің ишемиялық ауруы, аллергия, қатерлі ісік, қант диабеті деген аурулардың шығу себебінің немен байланысты екенін білесіз бе? Оның бірден бір себебі — тағамдану құрылымының бұзылуы. Заманауи адамның тағам рационы ағзаны қажетті дәрумендер, минералдар, аминоқышқылдармен қамтамасыз етпейді. Зерттеулер нәтижесі қазақстандықтардың 60 пайызының кальцийді, темірді, магнийді мөлшерден аз пайдаланатынын анықтап отыр. Ағзаға қажетті «С», «В» дәрумендердің, фоли қышқылы, бета-каротиннің жетіспеушілігі байқалады.
Толығырақ осы жерден оқыңыздар