Республикæйы ныр 5 къуырийы дæргъы фылдæр кæны коронавирусæй рынчынты нымæц. Се ‘хсæн алы кары адæм дæр. Фылдæр парахат кæны индиаг штамм. Уый тыххæй оперативон штабы æмбырды фехъусын кодта Уæрæсейы фæлхасгæнджытæм цæстдарды Цæгат Ирыстоны управленийы разамонæг Тыбылты Алан. Æмбырд амыдта Тускъаты Таймураз.
Æппынæдзух арæзт цæуынц рейдтæ дæр. Хицауады сæрдар куыд фæнысан кодта, афтæмæй хæрæндæтты æмæ егъау дуканиты æнæниздзинады домæнтæ хъæуы фæкарздæр кæнын. Фæтк чи не ‘ххæст кæна, уыдонæн суанг сæ архайд дæр бауромын.
Медицинон куыстуæтты уавæры тыххæй фехъусын кодта Цæгат Ирыстоны æнæниздзинад хъахъхъæныны министры хæстæ рæстæгмæ æххæстгæнæг Тебиаты Сослан. Куыд бафиппайдта, афтæмæй Æрыдоны районы рынчындоны бацæттæ кодтой 103 бынаты, Сывæллæтты Республикон клиникон рынчындоны та – 30 бынаты.
Дарддæр цæуы вакцинаци дæр. Республикæйы ныридæгæн прививкæ скодтой 111 мин 855 адæймаджы. Æппæтæй вакцинаци къаддæр ацыдысты Кировы районы. Скодтой йæ цæрджыты 19%. Республикæйы хицауады сæрдары хæстæ рæстæгмæ æххæстгæнæг дзуапдæттæг министрадæн бабар кодта, стационартæй кæй рафыссынц, уыдонæн вакцинаци ацæуынæн хъæугæ уавæртæ саразын.
Районты разамонджыты тыхсын кæны, адæм зианты æмæ чындзæхсæвты бирæгæйттæй кæй æмбырд кæнынц æмæ æдасдзинады домæнтæ кæй не ‘ххæст кæнынц, уый. Уымæй уæлдай, районты рынчындæтты нæй цалдæр хуызы хостæ. Куыд рабæрæг, афтæмæй республикæйы æвæрæны сты Тускъаты Таймураз сæ хæстæгдæр рæстæг бабар кодта баххæст кæнын.